MALIANA, STLTIMORLESTE.com — Hospital Referál Maliana presiza atensaun Estadu atu responde ba falta médiku espesialista, stok aimoruk menus, ambulánsia limitadu no infraestrutura ne’ebé seidauk sufisiente.
Kondisaun ne’e sai obstákulu ba kapasidade hospital nian atu fornese servisu saúde ne’ebé adekuadu ba komunidade, liuliu pasiente sira ne’ebé presiza tratamentu espesífiku.
Aleinde rekursu umanu, disponibilidade aimoruk no ekipamentu médiku mós sai parte importante atu garante prosesu diagnóstiku no tratamentu la enfrenta limitasaun.
Iha sorin seluk, transporte pasiente no fasilidade operasaun ne’ebé sufisiente presiza sai prioridade, tanba hospital referál iha responsabilidade atu atende pasiente sira ho kondisaun saúde oioin.
Dezafiu sira ne’e presiza atensaun no koordenasaun entre hospital, Ministériu Saúde no entidade kompetente sira atu buka solusaun ne’ebé bele hametin kapasidade atendimentu saúde iha Munisípiu Bobonaru.
Diretór Servisu Atendimentu Klínika Hospital Referál Maliana, Dr. Henrique Soares, esplika katak hospital ne’e fornese atendimentu saúde nivel primáriu, sekundáriu no tersiáriu. Maibé, nesesidade médiku espesialista sei sai dezafiu.
Tuir Dr. Henrique, hospital iha médiku espesialista balun, maibé númeru ne’ebé disponivel seidauk responde nesesidade atendimentu pasiente sira.
“Ita iha espesialista internu na’in 2, espesialista ba moras laran na’in 2, pediatra na’in 2, no espesialista sira seluk. Maibé ami presiza tan espesialista,” Dr. Henrique dehan ba jornalista sira iha nia knaar fatin, Hospital Referal Maliana, Sesta (13/11/2026).
Nia hatutan katak, hospital seidauk iha kardiologista atu atende pasiente ho moras fuan. Iha tempu hanesan, médiku jerál hamutuk na’in 25 de’it.
“Ba fuan nian, ami seidauk iha kardiologista espesialista. Depois ne’e, ba médiku jerál JP hamutuk 25 ema de’it,” Dr. Henrique esplika.
Limitasaun seluk mak kona-ba disponibilidade aimoruk. Dr. Henrique hatete katak Hospital Referál Maliana iha stok aimoruk 2,4% de’it, husi item 384 ne’ebé rejista.
“Stok aimoruk agora dadaun, iha Hospital Referál Maliana ita iha 2,4% husi 384 item ne’ebé existe,” nia dehan.
Nia mós temi katak aimoruk ne’ebé stok out atinji 9 to’o 15%, situasaun ne’ebé presiza atensaun sériu husi entidade responsavel sira.
Iha área transporte médiku, hospital iha ambulánsia ida de’it atu atende populasaun iha munisípiu tomak. Kondisaun ne’e sai problema bainhira ambulánsia presiza manutensaun iha Dili.
“Ba populasaun tomak iha Munisípiu Bobonaru, ami iha de’it ambulánsia ida. Bainhira ambulánsia ne’e ba Dili, ami laiha ambulánsia atu tula pasiente sira,” nia dehan.
Dr. Henrique esplika katak, pasiente ne’ebé presiza atendimentu nivel tersiáriu tenke hetan referénsia ba Dili, liuhusi transporte terrestre ka aviaun.
Nia husu entidade relevante sira atu buka solusaun ba transporte pasiente, tanba referénsia ba Dili mós envolve kustu ne’ebé presiza konsiderasaun.
Limitasaun infraestrutura mós afeta kapasidade hospital nian, liuliu iha sala operasaun. Tuir Dr. Henrique, iha semana balun hospital bele hala’o operasaun ba pasiente 10 to’o 15 resin.
“Ami presiza loos atu estende ka loke tan sala ida, tanba dala ruma semana ida ami bele opera ba pasiente 10, 15 resin,” nia dehan.
Nia husu apoiu husi Estadu, liuhusi Ministériu Saúde, atu aumenta kapasidade sala operasaun, hodi bele responde ba númeru pasiente ne’ebé presiza intervensaun sirúrjika.
Aleinde sala operasaun, laboratórium mós presiza ekipamentu modernu no kompletu, inklui funsionáriu ho kapasidade atu opera ekipamentu sira ne’e.
“Ami-nia laboratórium presiza tan ekipamentu ne’ebé modernu no kompletu, no funsionáriu ne’ebé sei servisu iha ne’ebá,” Dr. Henrique dehan.
Nia husu Ministériu Saúde no ajénsia relevante sira atu fó atensaun ba nesesidade Hospital Referál Maliana, hodi hadi’a kapasidade atendimentu no garante servisu saúde ne’ebé di’ak liu ba komunidade Bobonaru.
Iha sorin seluk, komunidade Maliana, Silveiro da Silva, iha esperansa atu asesu ba servisu saúde ne’ebé fasil no ekipamentu ne’ebé kompletu, hodi bele hetan tratamentu besik uma.
“Ha’u husu ba Ministériu Saúde, haree lai Hospital Maliana. Ami la husu buat boot, ami husu de’it aimoruk kompletu, ambulánsia natoon, no médiku espesialista atu ami la presiza halai ba Dili de’it. Ami iha Maliana, ami mós sidadaun Timor-Leste hanesan ema seluk,” nia dehan.
Maski hasoru limitasaun iha fasilidade, Silveiro apresia esforsu médiku no enfermeiru sira ne’ebé kontinua servisu atu ajuda pasiente sira.
“Maski ekipamentu menus, médiku no enfermeiru sira iha ne’e esforsu an duni atu ajuda ami. Sira servisu ho laran. Tanba ne’e, ami komunidade husu de’it atu Estadu fó apoiu ba sira, atu sira bele servisu ho di’ak liu tan ba ami,” nia hatutan.
(car)
