DILI, STLTIMORLESTE.com – Eskola balun iha area remotas iha Munisipiu Manatuto sei menus fasilidade hanesan meza no kadeira ba estudantes.
Diretor Servisu Edukasaun Munisipiu Manatuto, Patricio da Cruz Quintão hatoo kestaun nee ba jornalista STL liu husi telefone, Kuarta nee (06/08/2025).
“Atu hadia ita nian kondisaun eskola sira, maibe ninia problema mak hanesan nee, ami nian Xefe Departamentu ida neebe mak toma konta kona-ba dadus ida nee sei ba foti hela relatóriu dapur ninia, ita nian inspetor sira kontinua identifika, maibe ninia problema mak nee, tanba sira nee kada postu, sira identikasaun iha terenu nee hatoo ona mai iha diresaun infraestrutura ninia, nee dadus kompletu ona, ita hein halo proposta deit ona ba iha nasional,” nia esplika.
Tuir Patricio katak, dadus neebe mak identifika iha kada eskola nee mai hotu ona, hein halo deit proposta, liu-liu eskola balun neebe mak sei menus meza no kadeira, maibe durante nee halo ona proposta no husi ME fo apoiu, nee duni numeru eskola balun deit mak sei menus meza no kadeira.
Nunee mos Superintendente Edukasaun Munisipiu Dili, Cesarina Correia Guterres hatete, kona-ba kondisaun infraestrutura iha ESJ 5 Maio konstrusaun sala 8, maibe agora daudaun paradu hela. EBC Manleuana, uma tomak 1 iha sala 4 maibe ho kondisaun aat hotu. EBF mota ulun presiza halo konstrusaun ba sala de aula no eskola balun presiza meza no kadeira ba estudantes sira.
“Hau hanoin kona-ba ita nian meza no kadeira maioria iha eskola sira iha Munisipiu Dili sufisiente ona, maibe iha EBF Casnafar mak meza kadeira la too no balun aat ona. Ita nian eskola balun nee fasilidade meza no kadeira sufisiente ona para estudantes sira uza ba prosesu ensinu aprendizajen iha eskola idak-idak,” nia informa.
(jac)
