SMOP Baukau Submete Pedidu Estrada Rural Pakote 23 ba MOP

BAUKAU, STLTIMORLESTE.com – Servisu Munisipal Obras Publikas (SMOP) Baukau submete ona pedidu estrada rural neebe kondisaun grave hamutuk pakote 23 ba Ministeriu Obras Publikas (MOP) atu reabilita iha tinan 2026.

Diretor Servisu Munisipal Obras Publikas Baukau, Agostinho Ximenes esplika, liu husi levantamentu dadus ba estrada rural sira iha Munisipiu Baukau kobre iha Postu Administrativu Baukau Vila, Baguai, Kelikai, Laga, Venilale no Postu Administrativu Kelikai Antigu, identifika ona kondisaun estrada neebe grave iha tempu udan difikulta movimentasaun transporte publiku no privadu.

Tanba nee liu husi levantamentu no elabora dadus submete ona ba Ministeriu Obras Publikas atu enkaixa iha planu Orsamentu Jeral Estadu 2026, nunee estrada hirak nee bele hetan reabilitasaun hodi fasiita movimentu komunidade sira ho transporte publiku no privadu.

“Kona-ba estrada rural neebe Obras Munisipiu Baukau prepara iha linha estrada hamutuk 10, ba asuntu tekniku fahe ba pakote hamutuk 23 prepara ba 2026 ita submete tiha ona,” hateten Agostinho Ximenes ba jornalista sira iha knaar fatin Uatulete, Baukau, Kuarta, (06/08/2025).

Nia sublina, pedidu estrada rural hamutuk pakote 23 neebe submete ona ba nasional, tuir tekniku sei responde ba distansia kilometru 50.75 neebe sei implementa iha Munisipiu Baukau kobre Postu Administrativu sira mak hanesan Postu Baukau Vila sei implementa husi Suku Bukoli ba Aldeia Lekiloiwatu no estrada husi Wataboo ba area branka fatuk boot.

Postu Laga sei implementa husi Atelari ba Borudua no husi Saelari ba Binagua, Postu Kelikai sei implementa husi Saraida ba Adukele no husi Ailita ba Buibela Lena, Kelikai Antigu sei implementa husi Gurusa ba Kulugia, Postu Vanilale sei implementa husi Osobousoru ba Ariana Waibobo inklui Postu Administrativu Baguia sei implementa husi Laumakalari too Bailari.

Enkuantu pedidu reabilita estrada rural tinan 2026, Postu Matebian no Postu Administrativu Vemasi sei hetan apoiu husi parseiru dezenvolvimentu UNDP.

“Estrada sira neebe ita submete nee aat liu, kuandu tempu udan ona ita nia komunidade sira labele lao, maibe depende ba nai ulun liu-liu Ministeriu Obras Publikas mak bele foti dezisaun,” Agostinho Ximenes akresenta.

Nia informa, pakote estrada rural hamutuk 23 neebe submete ona ba Ministeriu Obras Publikas kondisaun grave tebes, iha tempu udan difikulta movimentasaun komunidade sira ho transporte, nunee obrigasaun dever servisu nuudar tekniku iha baze foti dadus relata ba nasional, maibe atu reabilita ou lae depende ba ministeriu kompetente.

Maibe hanesan dirijente Obras Publikas Munisipiu Baukau iha esperansa katak, reabilitasaun estrada rural ba Munisipiu Baukau sei kontinua akontese, tanba komunidade sira barak mak hein projetu reabilitasaun no konstrusaun sira husi anivel nasional.

Entretantu pakote estrada rural hamutuk 23 neebe Obras Publikas Munisipiu Baukau submete ba nasional ho tipu estrada multi suku no aldeia, no survei neebe ekipa halo iha terenu bazeia ba ezistensia edifisiu eskola, kapela inklui numeru habitante no seluk tan neebe kriteira presiza.

(tom)