DILI, STLTIMORLESTE.com – Governu liu husi Sekretariu Estadu Komunikasaun Sosial (SEKOMS), Expedito Loro Dias Ximenes hamutuk ho Prezidente Konselhu Imprensa (KI) Cesar Mali, ohin halo enkontru pre-eleminar hodi halo diskusaun kona-ba revisaun ba lei komunikasaun sosial.
“Ohin iha diskusaun dahuluk ami konkorda malu katak presiza atu haklean liu tan revizaun nee iha nia estrutura legislasaun nia, ami konkorda katak iha tempu semana oin mak ami diskute artigu por artigu neebe atu halo revizaun, ohin ami halo diskusaun preeleminar deit, atu hatete katak ami koalia preambulu deit , ami seidauk tama iha nia subtansia revizaun nia, semana oin mak ami tama iha subtansia revizaun lei komunikasaun sosial nia,” dehan Expedito ba Jornalista sira iha sala reuniaun DNDM SECOMS, Kuarta (6/05/2025).
Nia dehan, importante mak Governu liu husi SEKOMS no KI konkorda katak presiza duni halo revizaun ba lei komunikasaun sosial, tanba lei komunikasaun sosial neebe uluk destintu deputadu sira iha legislatura iha VII Governu halo iha 2014, 11 anos ona ho avansa teknolojia ho preokupasaun husi publiku kona-ba komunikasaun sosia.
“Iha prosesu dezenvolvimentu, prosesu konstrusaun estadu ho nasaun entaun presiza duni atu reve, tanba nee mak too ona tempu konkorda malu ona atu presiza duni halo revizaun, ohin ami koalia pre-eleminar kona-ba prinsipiu jerais oinsa mak halo revizaun nee, ami sei kontinua koalia iha semana oin kona-ba subtansia,” katak Expedito.
Iha fatin hanesan, Prezidente Konselhu Imprensa, Cesar Mali hatutan, hakarak atu atinji objetivu ida hanesan komun ba interese ita hotu nia, hodi asegura jornalizmu iha ita nia rai nee bele lao tuir buat hotu neebe ita hakarak.
“Diskusaun sira hanesan nee ita laos halo dala ida deit, tanba ida nee importante tebes entaun ita kontinua halo diskusaun too iha objetivu final, entaun ohin ami presiza foka tan ba pontus balun neebe presiza ajustamentu para enkontru tuir mai ami bele entende malu diak liu tan,” tenik Cesar
Nia fundamenta, lei komunikasaun sosial ida nee importante tebes, tanba nee ita labele halo urjenti, atu regula ita hotu entaun ita tenke kuidadu no halo diskusaun ho klean.
(EST 1)
