DILI, STLTIMORLESTE.com – Sekretariu Estadu Formasaun Profisional Empregu (SEFOPE) liu husi Diresaun Nasional Empregu Externu (DNEE) ohin despedida ho trabalhador Timoroan sira hamutuk 103 hodi ba servisu iha Australia.
“Ohin hanesan oportunidade ida neebe mak diak tebes mai iha SEFOPE no Ministra Negosiu Pequenu Dezemvolvimentu Internasional ho multi kultura mak husu direita mai iha SEFOPE hodi mai hola parte iha serimonia despedida ba trabalhador sira neebe mak atu ba servisu iha Australia,” dehan Rogeiro Araujo Mendonça ba jornalista sira iha Palm Spraning Hilton, Dili, Kinta (07/08/2025).
Nia fundamenta, trabalhador sira neebe mak ohin despedida nee maioria trabalhador foun deit, sira neebe mak re entri nee 17 ka 18 deit, restu nee trabalhador foun hotu.
Nunee ho sorumutu neebe mak parte SEFOPE ho Ministra iha, Ministra kontente tebes tamba Programa Mobilidade Laboral neebe hanaran PALM Skil fo benifisiu boot tebes neebe mak Governu Autralia fo ba iha Governu Timor Leste.
“Hahu husi fulan rua ba kotuk trabalhador sira neebe mak ba servisu ona iha Australia hamutuk 20 mil ital, maibe 20 mil ital nee sira la konsentra hotu iha neeba, balun ba iha neebe mak sira nia kontratu fulan sia hotu sei fila mai depois seluk ba fali, numeru neebe mak agora akapta nee mak 20 mil ital,” katak Rogeiro.
Iha fatin hanesan, trabalhador Jaiminha da Silva Araujo husi area industria hatoo sentimentu kontente, tanba hetan tan oportunidade osan mean ida nee ba dala rua hodi ba servisu iha Australia.
“Hau orgulhu tebes ba oportunidade neebe mak hau hetan liu-liu ba iha area industria nia, hau agradese tebes, tanba hau ba tiha ona iha tinan kotuk,.maibe agora hetan tan oportunidade ida nee ba dala rua, oportunidade nee hanesan osan mean ida mai hau hodi ba fila fali iha Autralia, triste oituan tanba dook husi familia sira,” dehan Jaiminha ho matan been.
Nia tenik, benifisiu neebe mak hetan hanesan osan oituan hodi bele sustenta familia uma laran, laos iha tempu neebe mak badak maibe espera katak ba dala rua, ida nee nia sei halo buat diak ba familia sira.
“Hau sosa ona rai no mos ajuda labarik sira nia eskola iha Universidade sira, no osan balun sustenta ba nesesidade uma laran, espera oportundade ba dala rua ida nee hau sei halo buat diak ba hau nia familia sira,” katak nia.
Entretantu Trabalhador Jony Pereira hatoo sentimentu kontente hodi hatoo agradese ba Governu liu husi SEFOPE tanba bele loke oportunidade ida nee ba joven sira hodi bele ba servisu iha Australia.
“Hanesan trabalhador wainhira hetan oportunidade ida nee sente kontente, tanba ita servisu iha rai laran iha maibe ladun sufisiente atu sustenta ita, hau apresia tebes ba Governu liu husi SEFOPE ba oportunidade ida nee ba ami joven sira,” katak Jony.
Nia afirma, SEFOPE nafatin loke oportunidade ida nee ba joven sira, tanba joven sira barak mak too agora la hetan servisu, oportunidade ida nee labele too deit iha nee maibe nafatin loke oportunidade nee, nunee joven sira seluk mos bele hetan oportunidade ida nee.
Nia mos hatoo mensajen ba joven sira lalika lakon esperansa, nafatin badinas hodi esforsu aan buka esperiensia iha fatin fatin, liu-liu ba iha edukasaun formal no non formal sira tenke lao hotu, nunee futuru hakarak buka servisu sei atinji wainhira preparadu ho esperiensia neebe mak iha.
(EST 1)
