DILI, STLTIMORLESTE.com – Komemorasaun loron International Force in East Timor (INTERFET) ba dala 26 (20 Setembru 1999-20 Setembru 2025) tinan nee diferente ho tinan hirak liu ba, tanba tinan nee komemora ho jogu amigavel neebé partisipa husi F-FDTL, forsa Austrália, Estadu Unidu Amérika, Nova Zelándia no Japaun.
“Ida nee nuudar momentu importante atu forsa armada Timor-Leste kontinua hametin relasaun militár ho nasaun sira nee. Parabéns ba Governu, ba Komandu Xefe Estadu Maiór Jenerál Forsa Armada Timor Leste nian neebé hanesan uma-nain, Ministériu Defeza. Parabéns ba hotu-hotu, ba sira neebé organiza eventu importante ida-nee”, hatete Prezidente Republika, Jose Ramos Horta iha serimonia enserramentu jogu futeból amigavel entre F-FDTL no forsa Austrália, iha Estádiu Munisipál Dili, Sabadu (20/9/2025).
Prezidente Ramos Horta agradese mós forsa Austrália, Estadu Unidu Amérika, no Japaun neebé partisipa jogu amizade ida nee, tanba komemorasaun loron INTERFET nee laós atu komemora deit ho jogu amizade, maibé sai oportunidade neebé importante ba nasaun sira neebé uluk hola parte misaun INTERFET nian, hodi sira bele halo interkámbiu hodi reforsa kooperasaun militár ba malu.
Tuir Xefe Estadu, hasoru malu iha nee, iha rai doben ida-nee entre militár sira hametin liután relasaun nasaun sira. Nia hare hotu-hotu servisu diak tebe-tebes.
Prezidente Ramos Horta kongratula mos Embaixada Austrália no atleta sira neebé partisipa iha jogu nee. Nia hato’o parabens ba embaixada no parabéns ba atleta sira neebé iha klase hotu-hotu neebé partisipa iha jogu nee.
Nunee mos, Xefe Estadu Maiór Jenerál Forsa Armada, Tenente-Jenerál Domingos Raul Falur Rate Laek, dehan komemorasaun loron INTERFET nuudar selebrasaun anuál, tanba tinan-tinan sempre halo ho atividade oi-oin.
Tenente Jeneral Falur RateLaek hatete katak tinan nee Komando F-FDTL organiza diferente ho tinan sira liu ona, tanba selebra ho jogu amizade, programa interkámbiu forsa sira entre F-FDTL no forsa armada Austrália, tanba F-FDTL sira sei bá partisipa jogu futeból iha Austrália iha fulan oin no atividade relijioza nian.
Jeneral fitun tolu nee mos dehan, Austrália no Portugál nuudar parseiru estrátéjiku ba dezenvolvimentu formasaun ba militar Timor Leste.
“Ita-boot sira ba halo investigasaun karik sémak halo investimentu boot liu ba forsa defeza sira nee mak tau osan boot liu kualkér instituisaun iha mundu”, dehan Jeneral Falur.
Iha fatin hanesan, Ministru Juventude, Desportu, Arte no Kultura (MJDAK), Nelio Isaac Sarmento, esplika katak jogu amigavel nee nuudar parte ida husi diplomasia desportu hodi fortifika relasaun militár nian.
“Ita espera katak desportu nee laiha inimigu, liuhusi desportu ita konhese malu no ita fó valór ba fraternidade entre ita ho ita. Ida nee hanesan meiu diplomasia neebé ita-nia forsa sira halo para depois fortifika ita-nia relasaun”, hatete Nelio.
Iha sorin seluk, Reprezentante Xefe Estadu Maiór Jenerál Forsa Armada Austrália, Brigadeiru Jenerál Malcolm Wellsx hatete forsa Austrália kontente servisu hamutuk ho F-FDTL, liu husi programa kooperasaun defeza neebé Austrália ho Timor-Leste estabelese no ezersísiu harii hamutuk.
Brigadeiru Jeneral Malcolm Wellsx mos dehan iha komemora loron INTERFET ba da-26, liuhusi jogu amizade Xanana-Peter Cosgrove bele selebra fali misaun INTERFET halo ona ba Timor-Leste iha pasadu.
Nia dehan, jogu ida-nee atu selebra komemorasaun forsa INTERFET nian prezensa iha Timor- Leste iha tinan 26 liubá no relembra kooperasaun Xanana no Jenerál Peter Cosgrove neebe lidera INTERFET iha Setembru 1999.
“Ida nee, nuudar ezemplu neebé ita kontinua no ba jerasaun foun sira hodi dezenvolve ita-nia relasaun neebé iha ona,” esplika Brigadeiru Jeneral Malcolm Wellsx.
Antes halao jogu futebol entre F-FDTL kontra forsa Australia iha Estadiu Munisipal Dili, halao uluk jogu futsal feto F-F-FDTL kontra forsa feto Australia iha Kampu Futsal Kuatel Jeneral F-FDTL Fatuhada. Iha jogu futsal nee, ekipa feto F-FDTL mak sai manan nain ho skor 2-0.
Entretantu, jogu futebol entre ekipa F-FDTL kontra forsa Australia, ekipa forsa Australia mak sai vensedor liu husi penaidade 5-3.
Aleinde atividade desportu, F-FDTL no forsa Australia halao mos atividade kuda ai-horis iha foho lolon Suku Manleuana, Munisipiu Dili.
Jornalista: Mikael Mali Mau
Editor: Mikael Mali Mau
