DÍLI, STLTIMORLESTE.com – Centro Audiovisual Max Stahl Timor-Leste (CAMSTL) organiza Semináriu Nasionál Komemorasaun Tinan 35 Masakre Santa Cruz (1991–2026), ho tema “Reorientasaun Papel Juventude no Restaurasaun Valor Identidade Nasionál”, atu hametin koñesimentu jerasaun foun kona-ba istória luta no sakrifísiu povu Timor-Leste nian.
Lia hirak ne’e hato’o husi Prezidente Ezekutivu CAMSTL, Eudicitio Pinto, ba jornalista sira iha Salaun Universidade de Díli (UNDIL), Tersa (10/11/2026).
Eudicitio esplika katak, semináriu ne’e iha objetivu atu halibur hamutuk fali joven rezisténsia sira uluk ho jerasaun foin-sa’e ohin loron, atu sira bele fahe esperiénsia no memória kona-ba luta ba ukun-rasik-an.
Nia hatete katak, durante períodu rezisténsia, povu Timor-Leste hasoru sakrifísiu no sofrimentu boot, maibé ho korajen, reziliénsia no esperansa kontinua luta to’o hetan independénsia. Tanba ne’e, jerasaun foun presiza aprende no komprende istória luta ne’e, atu bele valoriza sakrifísiu ne’ebé jerasaun uluk halo.
Nia mós preokupa katak, iha sosiedade ohin loron, valor respeitu malu, unidade no koordenasaun entre ema hahú menus, inklui iha relasaun sosial ne’ebé teknolojia modernu dala ruma bele influénsia no lori ema atu haketak malu.
“Liu husi semináriu no komemorasaun tinan 35 Masakre Santa Cruz, ami hakarak reuniu hamutuk fali no restaura valor unidade nasionál ne’ebé ita iha uluk, atu joven sira bele hatene katak valor hirak ne’e labele lakon,” Eudicitio afirma.
Nia kontinua katak, hanesan mensajen husi saudozu Max Stahl, dignidade bele muda mundu. Tanba ne’e, jerasaun foun tenke kaer metin valor no prinsipiu nasionál sira, atu bele transmite ba jerasaun tuir mai no evita rai Timor-Leste monu ba tentasaun ne’ebé bele estraga unidade nasionál.
Nia subliña katak, mundu kontinua muda ho dinamika foun, tanba ne’e juventude presiza sai forte, iha responsabilidade no kontinua defende rai no soberania nasaun nian.
Semináriu Nasionál ne’e konvida estudante universitáriu, estudante eskola sekundária iha Dili, rezisténsia 12 Novembru, organizasaun naun-governamentál (NGO) no sosiedade sivíl atu partisipa, hodi hametin koñesimentu no unidade nasionál.
Liu husi atividade ne’e, CAMSTL hakarak fó oportunidade ba sobrevivente 12 Novembru atu fahe diretamente sira-nia esperiénsia kona-ba sofrimentu no sakrifísiu ne’ebé sira hasoru durante akontesimentu istóriku 12 Novembru 1991, iha Santa Cruz no Hospital Lahatene.
Eudicitio enfatiza katak, memória kona-ba luta no sakrifísiu povu Timor-Leste nian la’ós ba ema ida ka grupu balun de’it, maibé memória nasionál ne’ebé ema hotu, liuliu jerasaun foun, presiza hatene, valoriza no preserva.
Iha parte seluk, estudante Universidade Nasional Timor Lorosa’e (UNTL), Carmelinda Antonia da Costa Gusmao hatete, ne’ebé partisipa iha Semináriu Nasionál ho tema “35 Anos Masakre Santa Cruz (1991–2026), Reorientasaun Papel Juventude no Restaurasaun Valor Identidade Nasionál”, hatete katak liuhusi semináriu ne’e, sobrevivente 12 Novembru bele fahe diretamente sira-nia esperiénsia no istória kona-ba akontesimentu ne’ebé akontese iha loron 12 Novembru 1991.
Nia konsidera katak, oportunidade ida-ne’e importante tebes ba jerasaun foin-sa’e atu bele hatene kle’an istória no komprende sofrimentu, sakrifísiu no luta ne’ebé juventude sira uluk hasoru atu hetan ukun-rasik-an.
Nia dehan katak, istória hirak ne’e tenke sai hanesan matan-dalan ba juventude ohin loron, atu aprende husi luta no korajen jerasaun uluk nian, no kontinua defende liberdade no soberania nasaun ho responsabilidade.
(joa)
