DILI, STLTIMORLESTE.com – Embaixada Japaun iha Timor Leste neebe lidera husi Embaixador, Tetsuya Kimura realiza Festival Japaun 2025 hodi hatudu kultura, arte, no tradisaun oi-oin husi Japaun nian. Eventu nee, laos deit fo divertimentu maibe sai mos hanesan ponte ida hodi hametin amizade entre nasaun Sakura ho Timor Leste.
Embaixador Tetsuya Kimura iha ninia diskursu hato’o ninia apresiasaun ba parseiru no komunidade sira hotu neebé kontribui ba festivál nee nia susesu.
“Ita boot sira nia dedikasaun no servisu makaas halo festivál ida nee sai posivel, no ami kontente tebes haree rezultadu husi ita boot sira nia formasaun no prátika”, hatete Embaixador Tetsuya Kimura iha Resintu Timor Plaza, Dili, Sabadu (20/9/2025).
Kimura mós espresa nia onra hodi simu master nain tolu hosi Kodokan, sede mundiál judo nian, neebé harii iha tinan 1882 husi Jigoro Kano.
Nia mós hato’o nia agradesimentu ba voluntáriu JICA, Alumni JENESYS (Asosiasaun Antigu Alumni Japaun) nian iha Timor-Leste, empreza no ONG oioin Japaun nian neebé okupa kabina ka both 16 iha festivál nee, hodi hatudu buat hotu hahú hosi hakerek Kanji Japaun nian no hatais kimono tradisionál to’o espozisaun produtu sira. Alein de nee, sira mos koko gratuitu komunidade sira neebe mai iha Timor Plaza.
“Festivál nee hatudu demonstrasaun sira hosi arte marsiál tradisionál Japaun nian hanesan karate, Aikido, Shorinji Kempo, no Judo. Vizitante sira mós bele koko sira-nia liman iha origami, kaligrafia Japaun nian, no mós uza Yukata. Aprezentasaun muzikál sira hosi YMCA, CQR, Tsuneishi, no JICA mós anima atmosfera,” hatete Embaixador Tetsuya Kimura.
Nia mos hato’o kona-ba Timor-Leste nia envolvimentu iha Osaka Kansai EXPO 2025, iha neebé Prezidente Republika, José Ramos-Horta marka prezensa iha Loron Nasionál Timor-Leste nian.
“Prezidente Ramos Horta nia prezensa iha Japaun hametin liu.tán ami nia amizade. Hau hein katak tinan nee sai hanesan tinan ida neebé labele haluha ba relasaun sira entre ema sira no entre nasaun rua”, nia sublinha.
Entretantu, Ministru Juventude, Desportu, Arte, no Kultura, Nelio Isaac Sarmento, sublinha importánsia husi eventu nee hodi hametin lasu entre nasaun rua nee.
“Saida maka Japaun halo iha nee maka harii ami nia relasaun, hametin relasaun entre Japaun ho Timor Leste. Mai ita labele haree malu ona hanesan ema Japaun ho Timor-oan, maibé hanesan família ida deit”, tenik Nelio.
Nia mós apresia knaar husi voluntáriu japonés sira neebé hatene koalia Tetun no enkoraja alumni sira husi programa JENESYS atu kontinua dezenvolve sira-nia abilidade lian japonés nuudar forma amizade kulturál.
Festivál Japaun 2025 sai mós nuudar momentum importante atu haklean komprensaun no fraternidade entre povu Japaun no Timor-Leste liuhosi kultura, arte, no amizade neebé diak liu tan.
Tuir observasaun STL nian iha terenu hatudu katak depois Embaixador Tetsuya Kimura no MJDAK Nelio Isaac Sarmento abertura Festival Japaun 2025 nee, husi grupu arte marsial halo atrasaun bonitu no atrasaun bonita.
Jornalista: Mikael Mali Mau
Editor: Mikael Mali Mau
