DILI, STLTIMORLESTE.com – Ministeriu Edukasaun (ME) la preve orsamentu ba estudantes neebe melhor kualifikadu iha ezame nasional tinan akademiku 2025.
“ME la preve orsamentu ba asuntu ida nee, maibe ida nee sai nafatin asuntu neebe mak diak. Ida nee sai hanesan opiniaun ida ba iha futuru ami bele haree fila fali asuntu ida nee, maibe nestemomentu ami hakarak informa ba publiku katak, ME la preve osan ba estudantes sira mezmu melhor kualifikadu,” dehan Ministra Edukasaun (ME), Dulce de Jesus Soares ba jornalista iha salaun konferensia ME Vila Verde, Tersa (16/12/2025).
Governante nee fo ezemplu sekuandu estudantes sira atu kontinua estudu, sira nafatin halo tuir kriteria sira neebe mak estabelese iha instituisaun. Neebe mak sira rasik eskola ba, fiar katak, sira iha valor diak,liu-liu iha ensinu sekundariu jeral. Sira iha ona oportunidade atu ba eskola iha rai liur, nunee mos instituisaun ensinu superior sira iha rai laran.
“Se estudantes nee matenek no iha valor diak, hau fiar ita hatene sei hetan oportunidade, tanba governu la aloka bolsa estudu iha ME maibe iha FDCH. Nee duni dala ida tan iha bolsu estudu neebe mak governu trasa tiha ona mak iha FDCH,” nia informa.
Iha fatin hanesan Diretur Servisu Edukasaun Munisipiu Dili, Sabino Perreira dehan, iha Munisípiu la preve orsamentu ba asuntu ida nee, maibe servisu hamutuk ho governu India, sira mak oferese hela bolsa ba estudantes sira.
“Novembru ita halo ona zoom meting, nee konvida direitor eskola sira ba partisipa inklui estudantes sira. Ita sosializa informasaun ba estudantes no Diretur Eskola sira,” nia afirma.
Nia akresenta, governu India hakarak oferese bolsu estudu ba estudantes Timor oan ho sira nian kustu neebe maka mais bratu. Ida nee fo ona informasaun ba Diretor eskola sira, atu bele hatutan informasaun nee ba estudantes finalista sira.
Jornalista: Jacinta Sequeira
Editora: Domingas Gomes
