DÍLI, STLTIMORLESTE.com – Arguida inisiál R alega hetan ameasa husi namoradu inisiál F atu estraga bebé, durante julgamentu kazu infantisídiu iha Tribunál Judisiál Primeira Instánsia Dili (TJPID).
TJPID hala’o julgamentu ba arguida R no arguidu F, ne’ebé Ministériu Públiku akuzadu nu’udar koautór krime infantisídiu, iha Tersa-feira (13/10/2026).
Iha audénsia julgamentu, arguida R deklara katak nia hetan ameasa husi arguidu F, ne’ebé nu’udar nia namoradu, depoisde hatene katak nia isin-rua.
Tuir arguida nia deklarasaun, arguidu haruka nia konsumu tua manas atu estraga bebé. Arguida mós alega katak ameasa ne’e halo nia ta’uk atu fó hatene família.
Iha julgamentu, juís Arjentino Nunes lee faktu sira ne’ebé Ministériu Públiku aprezenta kona-ba relasaun entre arguida no arguidu, hahú husi tinan 2017.
Tuir akuzasaun, arguida R no arguidu F hahú namora iha 2017 no kontinua komunikasaun liuhusi telefone durante tinan rua, to’o 2019.
Iha Novembru 2019, sira hasoru malu diretamente iha uma arguida nia maun nian, no iha enkontru ne’e, sira halo relasaun seksuál.
Depoisde enkontru ne’e, arguida fila ba Díli atu hela hamutuk ho nia bin. Relasaun seksuál ne’e rezulta arguida isin-rua.
Tuir akuzasaun, bainhira arguida fó hatene arguidu kona-ba isin-rua, arguidu haruka nia buka aimoruk no konsumu aimanas, mina gandapura no tua sabu atu estraga bebé.
Ministériu Públiku alega katak arguidu mós ameasa atu oho arguida, se nia la estraga bebé, no dehan sei la kaben ho nia to’o nia inan-aman mate.
Durante fulan sia isin-rua, arguida subar nia kondisaun husi família, uza sintura metin atu ema seluk la nota, no la halo kontrolu saúde iha sentru saúde.
Tuir faktu akuzasaun, arguida ikus mai hahoris bebé feto ida mesak, no bainhira sente moras partu, bebé monu husi nia kabun-ulun no kona rai simentu.
Bebé ne’e tanis depoisde moris, maibé liu tiha tempu badak, nia para dada-iis. Arguida rasik mak korta bebé nia tali-umbilikál.
Tuir akuzasaun, tuku 06h00 dadeer, arguida falun bebé nia isin ho plastiku mean no soe iha mota ne’ebé besik nia uma.
Depoisde soe bebé, arguida fila ba uma, hamoos fatin partu no fase roupa sira ne’ebé hetan ran.
Arguida Hatudu Arrependimentu Iha Tribunal
Iha nia deklarasaun, arguida konfirma katak nia namora ho arguidu F, maibé subar relasaun ne’e husi família.
Arguida esplika katak, bainhira deskobre nia isin-rua, nia kontaktu arguidu atu fó hatene situasaun, maibé arguidu haruka nia konsumu tua manas.
Nia mós deklara katak, bainhira sente moras partu, nia koko kontaktu arguidu, maibé arguidu la atende telefone.
Iha momentu ne’e, arguida dehan nia mesak no sente ta’uk atu fó hatene nia bin ka família kona-ba situasaun ne’ebé enfrenta.
Arguida relata katak bebé moris no tanis, maibé depoisde nia korta tali-umbilikál, liutiha minutu balu, bebé para dada-iis.
Tanba ne’e, arguida deside falun bebé nia isin ho plastiku no lori soe iha mota besik uma, antes fila atu hamoos fatin partu.
Arguida deklara katak, liu tiha loron rua husi akontesimentu ne’e, polísia ba foti nia iha uma.
Nia mós esplika katak, durante isin-rua, nia subar kondisaun husi família tanba sente ta’uk, liuliu depoisde hetan ameasa husi arguidu.
Iha deklarasaun ikus, arguida hatudu arrependimentu ba hahalok ne’ebé nia komete.
Ministériu Públiku Akuzadu Koautór Infantisídiu
Ministériu Públiku konsidera katak hahalok arguida no arguidu kontribui diretamente ba mate bebé, no sira atua ho konsiénsia no vontade, maski hatene katak hahalok ne’e kontra lei.
Tanba ne’e, Ministériu Públiku akuzadu sira nu’udar koautór materiál ba krime infantisídiu, iha forma konsumada, tuir Artigu 142.º husi Kódigu Penál.
Depoisde rona arguida nia deklarasaun, tribunal deside adia audénsia julgamentu ba loron seluk atu rona deklarasaun husi arguidu F.
Julgamentu ne’e prezididu husi kolektivu juís Arjentino Nunes, Ivan Patrocenio no Yudi Pamukas.
Ministériu Públiku reprezenta husi prokuradór Bartolomeo de Araujo, enkuantu arguida no arguidu hetan asisténsia jurídika husi defensór públiku Sergio Dias Quintas no Fransisco.
(ter)
