DILI, STLTIMORLESTE.com – Servisu Edukasaun Munisipiu Dili simu ona rezultadu ezame nasional husi kurrikulu, tuir planu aban sei halao enkontru ho diretor eskola no Polisia Nasional Timor Leste (PNTL) sei asegura seguransa anunsia rezultadu ezame nasional iha Sesta semana nee.
Liafuan nee haktuir husi Diretor Servisu Edukasaun Munisipiu Dili, Sabino Perreira ba STL iha edifisiu ME Vila Verde, Kuarta (17/12/2025).
Nia dehan, foti ona estudantes sira nian rezultadu nasional.
“Ami foti ona estudantes sira nian rezultadu nasional, maibe Kinta aban ami sei halao enkontru ho Direitor eskola sira, hafoin enkontru ho diretor eskola sira. Ita nian esforsu aan nee mak iha Sesta nee mak ita nian eskola sira bele anunsia rezultadu ezame nasional ba ita nian estudantes sira. Ninia mekanizmu nee mak ami sei orienta ba eskola sira, inan aman estudantes mak sei ba foti rezultadu ezame nasional nee iha eskola ida-idak,” nia haktuir.
Tuir nia katak, inan aman estudantes sira dala barak sira rona tiha ida nee, bele halo barulhu. Kona-ba seguransa nee karta fo ba iha parte seguransa ninia, PNTL liu husi munisípiu atu nunee bele asegura seguransa anunsia rezultadu iha eskola sira.
Nunee mos Diretor Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora-Díli, Tomas Pinto hatete, eskola hotu-hotu sei tuir enkontru ou sorumutu ho Diretur Edukasaun Munisipal de Dili, iha loron aban depois enkontru mak foin distribui naran koletivu ba estudantes sira nian, depois eskola sei halo tan karta deklarasaun ba distribuisaun, ho nunee sei realiza iha Sabadu dia 20 de Dezembru.
Jornalista: Jacinta Sequeira
Editora: Domingas Gomes
