BAUKAU, STLTIMORLESTE.com – Estudante finalista husi Eskola Ensinu Baziku, Sekundaria no Tekniku Vokasional hamutuk nain 59 iha Munisipiu Baukau reprovadu iha rezultadu ezame nasional anu letivu 2025, tanba nee parte eskola sei koordena ho parte polisia atu asegura profesores sira iha nivel eskola.
Diretor Servisu Munisipal Edukasaun Baukau Afonso dos Santos da Costa esplika, anunsiu rezultadu ba ezame nasional iha nivel nasional realiza iha loron 16 Dezembru 2025, no Servisu Munisipal sira simu ona rezultadu refere nunee iha loron 17 Dezembru 2025 Servisu Munisipal Edukasaun Baukau, anunsiu rezultadu no entrega envolope rezultadu ezame nasional ba dirijente eskola sira, atu halo distribuisaun ba estudante sira iha nivel eskola neebe sei realiza iha loron 18 Dezembru nee.
“Ohin ita fahe rezultadu ba dirijente eskola ensinu baziku, sekundariu no tekniku vokasional. Ensinu baziku ita iha 55 pesoas mak reprovadu, ensinu sekundariu nain 9 mak reprovadu ensinu tekniku vokasional 100%,” Afonso informa ba jornalista sira, hafoin remata sesaun entrega rezultadu ezame nasional husi envolope ba dirijente eskola sira iha EBC, Vila Nova, Baukau, Kuarta (17/12/2025).
Nia sublina, estudante husi eskola ensinu baziku Sentral no Filial neebe partisipasi iha ezame nasional 98% hetan aprovadu no 2%, ho numeru estudante nain 55 reprovadu no estudante husi ensinu Sekundaria Jeral Publiku no Privadu estudante nain 2.321 hetan aprovadu nain 4, reprovadu enkuantu eskola tekniku vokasional liu husi nasional ho 100%.
Total estudante kompostu ensinu baziku, Sekundaria no Tekniku Vokasional neebe partisipa iha ezame nasional anu letivu 2025 liu rihun 5 no nain 59 hetan rezultadu reprovadu, maibe Servisu Munisipal Edukasaun Baukau konsidera nee normal.
“Nee normal, buat ida ezame nasional nee balu lakon no balu manan, mais husi Edukasaun Baukau ami sente orgulhu no agradese tanba 98% ensinu baziku no sekundariu pasa no tekniku vokasional liu hotu, neebe agora ita haree diak liu,” katak Afonso.
Diretor nee kompara, rezultadu ezame nasional ba anu letivu 2025 iha Munisipiu Baukau diak, tanba estudante sira maioria liu, maibe husi anu letivu 2024 ba kotuk estudante barak mak la pasa iha ezame nasional.
Iha fatin hanesan, Diretor EBC Tirilolo Baukau, Cesaltino Guterres de Sousa Belo esplika, rezultadu ezame nasional ba estudante sira husi eskola ensinu baziku neebe nain 55 hetan reprovadu maioria husi eskola ensinu baziku terseiru siklu Tirilolo, tanba iha estudante mane nain 10.
“Distribuisaun rezultadu sei distribui ba iha inan aman, tanba nain 10 kedas mak lakon ita sei hatene Polisia sira mai halo akompanhamentu, tanba ita nia vida la faan iha merkadu, tanba labarik sira neebe la aprova bele halo krime ruma,” nia informa.
Tuir Diretor eskola nee katak, estudante iha eskola EBC Tirilolo durante tuir ezame nasional sira seidauk hetan reprovadu too nain 10, maibe iha anu letivu 2025 atinji too nain 10, tanba nee sei koordena ho parte Polisia hodi prezensa iha eskola hodi akompanha prosesu distribuisaun rezultadu ezame nasional ba estudante sira nia inan aman iha loron 18 Dezembru nee.
Nia fo razaun, estudante nain 10 reprovadu iha ezame nasional anu letivu 2025, tanba iha ezame primeiru no segundu periodu kiik ba materia siensia fizika no naturais.
Jornalista: Tomas Reis
Editora: Carme Ximenes
