DILI, STLTIMORLESTE.com – Prezidente Republika (PR), Jose Ramos Horta hatoo parabens no kongratula Antonio Jose Seguro, eleitu Prezidente Portugal.
Iha loron Segunda (09/02/2026) Prezidente Republika Jose Ramos Horta iha nia karta lori naran Estadu Timor Leste no povu hatoo parabens no kongratula ba Antonio Jose Seguro, eleitu Prezidente Portugal.
Eleisaun neebe konklui nia segunda volta iha loron 8 fulan Fevereiru tinan 2026, hetan partisipasaun sívika neebe signifikativu. Rezultadu neebe makaas tebes reafirma kompromisu Portugal nian ba valor sira demokrasia, liberdade no estadu direitu.
Iha ninia karta parabens, Prezidente Ramos Horta destaka lasu istoriku, kultural no umanu neebe klean neebe halibur Timor Leste no Portugal. Nia hatudu konfiansa katak, ho lideransa Prezidente eleitu Antonio Seguro nian, Portugal sei halao nafatin papel xave ida iha palku internasional.
“Ho satisfasaun boot mak hau hatoo parabens ba Ita Boot nia eleisaun nuudar Prezidente Republika Portugal. Timor Leste akompanha ho apresiasaun partikular momentu ida nee iha vida demokratika português, país maun-alin ida neebe ita fahe lasu istoriku, kultural no umanu neebe klean. Hau iha serteza katak, iha Ita Boot nia lideransa Portugal sei kontinua halao papel fundamental ida iha Europa Uniaun, Komunidade País sira Lian Português nian no Sistema Nasoins Unidas nian, afirma-an tantu iha espasu europeu no internasional.” Dehan Prezidente Republika.
Prezidente Ramos Horta repete mos kompromisu metin Timor-Leste nian hodi aprofunda relasaun exelente amizade, kooperasaun no solidariedade entre nasaun rua nee.
Prezidente konklui ninia mensajen hodi dezeja susesu barak ba Prezidente eleitu Antonio Seguro iha kargu aas neebe nia sei asume iha tempu badak.
(eme)
