DILI, STLTIMORLESTE.com – Prezidente Republika (PR), Jose Ramos Horta lansa fatuk dahuluk ba Jardim Memoria Saudozu Nicolau Lobato iha Soibada, jardim neebe konstrui osan privadu husi PR.
Jardim ida nee finansia direta husi bolsu privadu Prezidente Republika Jose Ramos Horta nian, ho montante orsamentu hamutuk US$ 14.000, ho medida jardim metru 25 x 18.
Iha loron Tersa (10/02/2026) Prezidente Republika Jose Ramos Horta halo lansamentu fatuk dahuluk ba konstrusaun Jardim Mempria Saudozu Nicolau Lobato nia moris fatin, iha Manlala, Postu Administrativu Soibada, MunisIpiu Manatuto.
Saudozu Nicolau Lobato, nuudar Primeiru Ministru dahuluk no Prezidente Daruak Timor Leste nian, mate iha kombate hasoru Invazaun indonezia iha tinan 1978. Nicolau dos Resis Lobato figura istorika nasional neebe nia naran uza ona iha fatin publiku barak, hanesan aeroportu, palasiu prezidensial, avenida sira, eskola publiku, edifIsiu estadu, institusaun Estadu sira, estatua no fatin sira seluk, atu hamoris nafatin sentidu nasionalizmu iha rai-laran no iha nivel internasional.
Maski naran Saudozu Nicolau Lobato sai simbolu boot ba Republika Demokratika Timor-Leste, iha momentu balu sosiedade haluha fatin simples neebe nia hahu moris ba, iha Aldeia Manlala, Postu Administrativu Soibada, MunisIpiu Manatuto. Husi fatin simples ida nee mak Saudozu Nicolau Lobato hahu dalan ba servisu naran-boot hodi hamoris Timor-Leste iha mapa Mundial.
Hodi fo rekonhesimentu ba istoria no nia luta ba rai ida nee, Prezidente Republika Jose Ramos Horta no Laureadu Nobel ba Paz hamutuk ho famIlia Lobato foti inisiativa atu hahu harii Jardim Memoria iha Saudozu Nicolau Lobato Lobato nia Moris fatin.
Jardim ida nee finansia direta husi bolsu privadu Prezidente Republika nian, ho montante orsamentu hamutuk US$ 14.000, ho medida jardim metru 25 x 18.
Konstrusaun Jardim Memoria nee sei halao durante fulan tolu, ho envolvimentu direta husi ekipa Prezidensia Republika liu husi Unidade Sosiedade Sivil no Asuntu Sosial, ho objetivu atu preserva memoria istoriku, valoriza fatin orijenal no fo edukasaun istoria ba jerasaun foun kona-ba sakrifIsiu Saudozu Nicolau Lobato nian ba Timor Leste nia ukun rasik aan.
Inisiativa ida nee atu reforsa kompromisu Estadu no lideransa Nasional nian atu la too deit fo atensaun ba naran boot iha fatin sira, maibe mos atu fo honra simples neebe sai base ba luta, rezistensia no vitoria povu Timor Leste nian.
Iha okaziaun nee, representante familia Jose Lobato nuudar Oan husi Saudozu Nicolau Lobato, hatoo sentidu agradesimentu ba Prezidente Republika no hotu-hotu neebe fo apoiu ba realizasaun serimonia lansamentu ida-nee, inklui Ministeriu Obras Publikas, autoridade lokal sira, lia-nain sira, eskola no komunidade iha Soibada, neebe hamosu espiritu servisu hamutuk no solidariedade.
“Lori familia nia naran atu hatoo apresiasaun no mos obrigadu ba ita boot sira nia Prezenza iha Lansamentu Primeira Pedra ba Jardim Memoria Saudozu ninian. Primeiru hau mos tenke hatoo obrigadu ba Prezidente Ramos Horta tanba husi Sr. Prezidente mak inisia hodi fo inspirasaun ba FamIlia katak ita atu halo Jardim simples ida ba memoria avo sira nian no mos ba Pai Nicolau Lobato nian. Sr. Prezidente halo Komikmentu ida atu laos uza osan Estadu nian, maibe uza osan mai husi nia bossu Privadu rasik, se nunee hau nuudar oan mos labele husik Prezidente mesak maibe todan nee ita tenke leba hamutuk,” dehan nia.
Serimonia lansamentu nee hetan partisipasaun husi Administradora Postu Administrativu Soibada, autoridade lokal sira, estudante sira, lia-nain sira no komunidade lokal.
(eme)
