DILI, STLTIMORLESTE.com – Prezidente Republika (PR), Jose Ramos Horta hatete, Soibada fatin neebe sentidu espesial ba moris no fatin neebe kontribui ba formasaun moral, Intelektual no akademiku, liu-liu tempu estudu misaun katolika nian.
Prezidente Republika Jose Ramos Horta hatoo lia hirak nee liu husi nia diskursu, bainhira lansa fatuk dahuluk ba konstrusaun Jardim Memoria Saudozu Nicolau Lobato nian, iha Manlala, Postu Administrativu Soibada, MunisIpiu Manatuto, Tersa (10/02/2026).
Iha nia diskursu, Prezidente hateten katak Soibada iha sentidu espesial ba nia moris, tanba fatin ida nee mak fo kontribuisaun boot ba nia formasaun moral, intelektual no akademiku, liu-liu iha tempu nia estudu iha Misaun Igreja Katolika.
Prezidente mos rekonhese kontribuisaun igreja, eskola, padre no madre sira, hamutuk ho komunidade lokal, neebe fo impaktu pozitivu ba nia trajetoria moris.
“Tanba ohin hau mai bele hateten hau nia abut iha nee, hau deve barak ba Soibada, ba eskola iha nee, ba Padre no Madre sira, ba Igreja no familia neebe impaktu ba sira nia vida boot liu mak familia Lobato. Hira mak mate ka ita bele dehan hira mak moris, kuaze moos (mate) hotu kedas, tan deit luta ba indepedensia,” hateten Prezidente iha nia diskursu.
Prezidente Republika sublina katak, Jardim Memoria ida nee harii hanesan omenajen laos deit ba Saudozu Nicolau Lobato hanesan eroi nasional, maibe mos ba familia Lobato tomak no hotu-hotu neebe sakrifika sira nia moris ba luta independensia Timor Leste.
“Hau hakarak pesoalmente halo omenajen ba Nicolau Lobato maibe mos ba nia Familia Lobato tomak, Nicolau Lobato nia inan-aman mos mate, nee mak hau hakarak halo Jardim ida nee, nee hanesan hau nia kontribuisaun ida kiik ba famIlia Lobato ba Nicolau Lobato no ba Soibada,” hateten Prezidente Ramos Horta.
Xefe Estadu hatete, Soibada fatin neebe halibur ema lubuk sai matenek neebe oras nee barak kaer ukun barak mos sai ema matenek.
(eme)
