DILI, STLTIMORLESTE.com – Forsa Seguransa Polisia Nasional Timor Leste (PNTL) no orgaun judisiariu presiza foti asaun neebe rigorozu, hodi fo pena todan ba autor sira neebe komete kazu naok telefone, neebe rezulta mos sidadaun feto ida lakon nia vida iha area Praia dos Coqueiros Pantai Kelapa, Dili, foin lalais nee.
Akademista UNTL, Mário de Oliveira konsideira katak, krime neebe akontese iha tasi ibun nee laos ona kazu naok ka foti sasan ho kbiit deit, maibe nee krime hasoru umanidade no feto sira nia direitu ba moris ho hakmatek.
Tanba tuir nia analiza, kazu neebe halakon fali feto ida nia moris nee hatudu momos katak, kriminal sira la tauk ona forsa seguransa no lei neebe vigora iha nasaun nee.
“Kazu nee nuudar faktu krime neebe labele konsideira baibain, tanba nee foti ona sidadaun ida nia moris no hamosu tauk boot iha komunidade nia laran. Governu liu husi orgaun judisiariu presiza hatudu nia kbiit liu husi fo pena masimu ba kriminal sira, hodi nunee komunidade feto sira bele sente katak sira nia moris no seguransa hetan protesaun legal neebe masimu, no labele husik kazu nee lao nunee deit hanesan krime baibain ida,” dehan Mário ba STL, Tersa nee (09/06/2026).
Nia hatutan, penalizasaun neebe kman ba kazu sira hanesan nee iha pasadu, nuudar fator boot ida neebe halo kriminal sira la tauk no la hetan lisaun moral.
Akademista UNTL nee fo hanoin katak, se Tribunal sira la foti desizaun neebe foun no rigorozu, kazu hanesan sei aumenta ba bebeik, nunee bele hafoer fali imajen kapital Díli nian nuudar sidade neebe paz no seguru.
“Iha sirkuntansia hanesan nee, forsa seguransa labele gasta deit tempu, maibe tenke foti kedan estratejia foun neebe rigorozu liutan hodi kaer autor sira,”hatete akademista nee.
Hanesan Akademista Mário husu ba Polisia Nasional Timor Leste (PNTL) atu hadia kualidade patrulhamentu. Nia sujere atu uza mos teknolojia no tau postu seguransa fixu iha area tasi ibu Praia dos Coqueiros no fatin Publiku sira seluk neebe identifika nuudar zona risku boot, hodi duni tauk husi sidadaun sira nia laran, liu liu ba feto sira neebe presiza halao sira nia atividade iha tempu kalan.
Iha parte ketak Observador Politika, Jaime Soares husu ba Governu liu husi Ministeriu Interior (MI) atu labele haree deit kazu nee husi perspetiva seguransa nian, maibe tenke iha mos politika seriu ida hodi hadia ordenamentu sidade no kria fali baze naroman ba iha fatin nakukun sira.
Tanba tuir nia kazu krime neebe sae iha kapital Díli nuudar dezafiu boot ba estabilidade politika no dezenvolvimentu nasional, tanba nee labele husik estabilidade komunidade nian nee hamenus fali konfiansa povu nian ba Governasaun.
(car)
