DILI, STLTIMORLESTE.com – Prezidénsia Repúblika no Governu koordena preparasaun eventu internasionál estratéjiku haat ne’ebé sei realiza iha Timor-Leste durante tinan 2027.
Xefe Kaza Civil Prezidente Repúblika, Henriqueta Maria da Silva konvoka reuniaun koordenasaun ho Vise-Primeiru-Ministru, Francisco Kalbuadi Lay, no Ministru Juventude, Desportu, Arte no Kultura, Nélio Isaac Sarmento, atu diskute preparasaun eventu hirak-ne’e.
Reuniaun ne’e foka ba preparasaun eventu internasionál haat: Tour de Timor, Maratona Internasionál Dili, Horasis Ázia no tornéiu Xadrez ba Pás (Chess for Peace).
Inisiativa hirak-ne’e hetan apoiu husi Estadu no sei kontribui ba promosaun turizmu, dezenvolvimentu ekonómiku, diplomasia desportiva no kapasitasaun juventude.
Enkontru Horasis Ázia sei halibur lider emprezariál internasionál atu buka oportunidade investimentu iha Timor-Leste.
Enkuantu ne’e, Tour de Timor sei reativa kompetisaun siklismu transfronteirisu, no Maratona Internasionál Dili sei hetan edisaun espansaun.
Governu mós sei apoia tornéiu Xadrez ba Pás, nu’udar plataforma atu promove dame no dezenvolvimentu juventude.
Vise-Primeiru-Ministru, Francisco Kalbuadi Lay, manifesta apoiu ba kriasaun komisaun orientadora interministeriál atu koordena finansiamentu, protokolu internasionál no parseria públiku-privada.
Xefe Kaza Civil, Henriqueta Maria da Silva, enfatiza importánsia koordenasaun entre ministériu sira atu asegura susesu eventu hirak-ne’e.
Eventu estratéjiku sira-ne’e la’ós de’it atu selebra marku istóriku Timor-Leste nian, maibé mós atu lori benefísiu sustentável ba turizmu no ekonomia lokál.
Preparasaun eventu hirak-ne’e sai parte husi esforsu Estadu nian atu aproveita komemorasaun tinan 25 Restaurasaun Independénsia iha 2027, hodi hasa’e pozisaun Timor-Leste iha nivel internasionál.
(eme)
