DILI, STLTIMORLESTE.com – Feto nia partisipasaun iha Funsaun Publiku numeru progresivu tebes, maske dala barak iha mudansa.
Kestaun nee hatoo husi Sekretaria Estadu ba Igualdade (SEI), Elvina Sousa Carvalho ba jornalista sira iha Hotel Palm Fatuhada, Tersa nee (09/06/2026).
Nia hatete, daudaun nee feto nia involvimentu iha funsaun publika numeru progresivu kompara ho tempu uluk.
“Ita iha progresu diak tebes, bainhira ita koalia kona-ba feto partisipasaun iha lideransa liu-liu iha funsaun publika ita iha mudansa ida neebe mak progresivu tebes, liu liu feto maluk sira neebe mak okupa pozisaun diretora jerais, diretora nasionais no kargu sira seluk, ami nafatin servisu atu garante feto ho mane direitu hanesan, feto ho mane iha direitu foti desizaun neebe hanesan, tanba nee feto sira merese foti desizaun iha fatin neebe iha autoridade foti desizaun feto ho mane iha direitu hanesan,” dehan SEI.
SEI nafatin servisu hamutuk ho parseiru sira hodi hakbiit no hasae numeru partisipasaun feto iha lideransa.
Nia hatete, daudaun kuaze 30% feto iha lideransa iha funasaun publika maibe numeru nee mos defende tanba dala ruma iha mudansa lideransa no balun hetan ezonerasaun balun hetan promosaun, tanba nee numeru nee sae no tun tuir tempu.
“Maibe ita hakarak instituisaun sira liu liu lideransa instituisaun sira nafatin iha sensibilidade atu fo oportunidade neebe hanesan liu liu fo ba feto maluk sira laos tanba sira feto maibe tanba sira iha direitu neebe hanesan ho mane no sira mos iha abilidade no kapasidade neebe mak hanesan,” dehan Sekretaria Estadu.
Nia enkoraja feto sira nafatin luta ba oin maske sei hasoru bareira oin oin, maibe nafatin ho korajen lao ba oin hatudu ba mane katak feto mos bele foti desizaun lais tanba lei deit mak garantia maibe tanba kapasidade duni.
(eme)
