AMBENO, STLTIMORLESTE.com – Koordenador Institutu Nasional Seguransa Sosial (INSS) destakadu iha Rejiaun Administrativa Espesial Oecusse-Ambeno (RAEOA), simu ona karta notifikasaun husi Prezidente INSS, Jevarino da Costa Bobo hodi sesa ninia mandatu maibe sente triste tanba la iha baze legal ba Koordenador INSS foun Oecusse, tanba nee dokumentus no xave edifisiu sei adianta hodi hein baze legal.
Tuir Koordenador INSS-RAEOA, Teotonio Tolan iha serimonia handover kargu koordenador INSS Sesante ba Koordenador INSS-RAEOA foun neebe hetan nomeasaun husi Prezidente INSS, Jevarino da Costa Bobo maibe la iha baze legal hodi asina dokumentus INSS-RAEOA tuir prosedimentu legal bainhira handover kargu Koordenador.
“Hau sente triste tanba, iha serimonia handover kargu Koordenador INSS, atu entrega ba se, tanba nomeasaun husi Prezidente INSS ba Agustinho Obe, maibe la iha baze legal ida hodi asina dokumentus ofisial neebe durante nee Koordenador INSS Sesante neebe hau rasik mak hetan nomeasaun no tomada de pose, akompanha direitamente husi Ministra Solidariedade Sosial no Inkluzaun, Veronica das Dores ho Visi Ministra Solidariedade Sosial, Seu Brites, hau simu deit karta sesa kargu maibe laiha baze legal, atu entrega serbisu nee ba se,” dehan nia.
Iha biban nee, Agustinho Obe deklara iha serimonia handover serbisu koordenador Sesante ba Koordenador INSS atual, maibe seidauk hetan karta ofisial ida atu asume knaar Koordenador INSS-RAEOA.
“Hau klarifika iha nee katak, hau laos atu asume knaar Koordenador INSS-RAEOA tanba dadaun hau nuudar tekniku ba iha INSS-RAEOA, tanba nee ohin hau seidauk bele asina dokumentus sira neebe prepara ona husi Koordenador INSS-Sesante, Teotonio Tolan, tanba nee ita sei hein desizaun husi nivel altu,” dehan nia.
Iha oportunidade hanesan, Diretor MSSI-RAEOA, Vitor Manuel da Paixao agradese ba Koordenador INSS-RAEOA, neebe asume knaar iha Oecusse durante tinan 1 ho balun, atu serbisu diak ka la diak, ida nee povu maka sei fo valor maibe apresia tanba ezerse ona knaar nee iha Oecusse.
“Husu ba Koordenador INSS-RAEOA foun atu kontinua serbisu hirak neebe maka husik hela husi Koordenador INSS-RAEOA Sesante, atu labele sakrifika povu, tanba povu hein hela ita nia prezensa hodi atende sira, liu liu idozus no invalidus sira nomos serbisu sira seluk-seluk tan,” dehan nia.
(jos)
