DILI, STLTIMORLESTE.com – Governu Timor Leste manifesta solidariedade neebe klean ba Governu no povu Republika Filipinas hafoin rai-nakdoko ho magnitude 7,8 neebe akontese iha ilha Mindanau iha loron Segunda feira (08/06).
Rai Nakdoko iha ilha Mindanao nee hamate ema barak, kanek, estragus makaas ba infraestruturas no mos evakuasaun populasaun sira tanba risku ba tsunami.
“Iha momentu susar boot ida nee, Timor Leste hatoo nia sentidu kondolensia klean ba familia vitima sira no dezeja rekuperasaun lalais ba sira neebe kanek,” haktuir nota komunikadu imprensa neebe STL asesu husi governu iha Tersa feira (09/06/2026).
Governu Timor Leste akompanha hela evolusaun situasaun nee ho preokupasaun no rekonhese servisu autoridades Filipinas, servisu emerjensia no ekipa salvamentu sira neebe mobiliza ona atu fo asistensia ba komunidade sira neebe afetadu.
Rai nakdoko nee halo edifisiu sira monu, eletrisidade mate no alerta kona-ba tsunami iha zona tasi-ibun balun iha Filipinas no mos nasaun sira seluk iha rejiaun nee. Autoridade sira kontinua avalia dimensaun husi estragus no mos koordena operasaun resposta no rekuperasaun nian.
Ministru Prezidensia Konselhu Ministrus no Portavos Governu nian, Agio Pereira mos lori Governu no povu Timor Leste nia naran hato’o sentidu kondolensia klean ba Governu Filipina ba situasaun difisil neebe estadu nee hasoru.
“Iha momentu tristeza ba povu filipinu ida nee, Timor Leste espresa nia solidariedade ba Filipina, nasaun amigu ida no parseiru kleur ona iha ambitu ASEAN. Ami hatoo kondolensia ba família vítima sira no dezeja rekuperasaun lalais ba vítima sira neebe hetan kanek no mos komunidade sira neebe afetadu husi trajedia ida nee,” sita komunikadu.
Entretantu tuir informasaun neebe STL sita husi KOMPAS.com katak, rai nakdoko ho magnitude (M) 7,8 neebe akontese ilha Mindanao, Filipina sul, iha loron Segunda (08/06). Autoridade lokal sira relata katak ema hamutuk 35 mate tanba dezastre natural ida nee.
Tuir relatoriu ofisial, rai nakdoko boot ida-nee akontese iha loron Segunda, tuku 07:37 dadeer tuir oras lokal.
Autoridade sira fo avizu sedu kona-ba tsunami iha nasaun balun, inklui Filipina, Indonezia, Japaun no Australia, maibe oras balun depois avizu nee kansela ka hamenus ninia nivel alerta.
Iha atualizasaun dadus iha Segunda kalan Gabinete Defeza Sivil Filipina konfirma katak maioria vítima mate sira hela iha rejiaun Soccsksargen, ho total ema 31 mate. Enkuantu nee, vitima nain 4 seluk rejista iha rejiaun Davao.
Laos deit vitima mate, autoridade Filipina sira mos relata katak ema hamutuk 134 hetan kanek no familia hamutuk besik 10.000 tenke sai husi sira-nia uma tanba uma sira estraga aat, tuir relatoriu BBC iha Tersa (09/06/2026).
Antes fo sai numeru ida nee, governu uluk fo relatoriu inisial neebe hatete katak ema 32 mate no ema 12 lakon.
Ba informasaun, ilha Mindanao mak ilha daruak boot liu iha Filipina, tantu husi area teritoriu no numeru populasaun, no sai hela fatin ba ema hamutuk besik 26 milhaun.
Too agora, ajensia nasional ba jestaun dezastre Filipina sei kontinua halo verifikasaun ba dadus vitima sira.
Hodi responde ba dezastre ida nee, Prezidente Filipina Ferdinand Marcos Jr. asegura katak instituisaun relevante hotu-hotu movimenta ona ho lalais atu koordena medida resposta emerjensia.
“Governu nasional daudaun nee lao hela no ami sei la husik Mindanao,” dehan Prezidente Marcos Jr. iha nia deklarasaun ofisial.
Prezidente Marcos Jr. mos fo instrusaun direta atu suspende atividade ensinu-aprendizajen iha area sira neebe afetadu. Medida ida-nee foti tanba loron neebe rai nakdoko coincide ho loron dahuluk ba tinan letivu foun eskola sira iha Filipina.
(alb)
