BAUCAU, STLTIMORLESTE.com – Autoridade Suku Uma Ana Iku, Postu Administrativu Venilale, Munisipiu Baucau, submete ona proposta ba Prezidente Republika (PR) atu konstrui uma ba familia vulneravel rua iha suku refere, neebe hela uma kondisaun aat.
Xefe Suku Uma Ana Iku, Antoninho da Costa Freitas aprezenta, tuir orientasaun husi asesor prinsipal husi Prezidente Republika neebe iha fulan Maiu 2026 prezensa iha Suku Uma Ana Iku observa uma komunidade Idozu António Mira Belo no Oan Felisberta Pereira Belo inklui idoza Maria Baptista Guterres ho nia alin Alcina Ximenes de Sousa iha Aldeia Wai-Tunau neebe hela iha uma kondisaun aat.
Nia haktuir husi observasaun refere Asesor prinsipal husi Prezidente Republika orienta kedas Autoridade Suku atu diriji proposta urujente ba Prezidente Republika, nunee bele aloka orsamentu no konstrui uma dignu ba familia vuneravel rua refere.
“Proposta nee hau submete tiha ona ba Nai Prezidente ita hein deit resposta husi Nai Prezidente, tanba Prezidente rasik sei buka badaen hodi halo uma nee konstrusaun durante fulan tolu nia laran,” hateten Xefe Suku Uma Ana Iku, Antoninho da Costa Freitas ba STL iha Vila Nova Baucau, Kuarta (10/06/2026).
Nia sublina, proposta husi Suku ba Prezidente Republika iha fulan Maiu ho urujente, iha neebe husi proposta refere husu Prezidente Republika aselera prosesu sira no implementa lalais prosesu konstrusaun uma dignu ba familia vuneravel rua refere. Tanba familia vuneravel António Mira ho nia oan hetan ona uma natoon husi ekipa FURAK enkuantu idoza Maria Baptista Guterres ho nia alin Alcina Ximenes de Sousa nafatin hela uma kondisaun amesadu.
Nia komenta, mezmu proposta husi Suku ba Prezidente Republika urujente, maibe responde sei tarde, tanba prosesu administrasaun, maibe Autoridade Suku garante Prezidente Republika sei konstrui uma dignu ba familia vuneravel refere.
“Ita husu ba prosesu sira nee aselera, tanba ita haree ita nia komunidade nee uma hela fatin susar tebe-tebes,” Antoninho rekomenda
Entretantu, tuir istoria, idozu António Mira Belo idade liu 80 ho nia oan feto durante tinan naruk hela uma kondisaun aat, tanba uma refere taka deit ho nuu tahan, maibe atual nuu tahan refere dodok iha neebe bainhira udan iha tempu kalan sira nain rua toba deit iha udan laran, maibe provizoriu sira nain rua hetan ona uma natoo ida husi ekipa FURAK neebe lideradu husi Rio Soares.
Enkuantu, Idoza Maria Baptista Guterres atual idade 76 kondisaun fiziku ema ho difisiensia ain no nia alin Alcina Ximenes de Sousa idade 57 difisiensia liman parte loos.
Idoza Maria Baptista Guterres iha laen no oan mane ida, maibe fila ona ba Aman Maromak kanudan Santo husik hela idoza mesak ho nia feto foun no beoan sira.
Idoza Maria Baptista Guterres nia feto foun no beoan sira hela ketak, tanba nee idoza Maria no nia alin Alcina Ximenes de Sousa neebe laiha laen kaben no oan sira nain rua hela hamutuk iha uma kalen naton ida kompostu kuartu toba fatin ida, sala ida no varanda.
Husi kondisaun uma neebe atual sira nain rua hela konstrui husi jovem sira iha bairo laran no daudaun kondisaun aat, tanba kalen neebe taka la prega ho pregu, maibe tahan deit ho au, nunee mos gravat uma nian ho au neebe agora hahu dodok.
Husi kondisaun uma refere fo impaktu ba sira nain rua nia deskansa kalan, tanba bainhira udan no anin akontese iha tempu kalan, obrigado sira nain rua tenke hader husi toba fatin.
No prezensa asesor prinsipal husi PR iha terrenu observa moris sidadaun nain 4 nee, tanba hetan publikasaun notisia husi media Suara Timor Lorosa’e (STL) no RTTL,EP.
(tom)
