AMBENO, STLTIMORLESTE.com – Ministeriu Agrikultura Pekuaria Peskas no Floresta (MAPPF) ho Autoridade Rejiaun Administrativa Espesial Oecusse-Ambeno (RAEOA) hamutuk ho natar nain sira iha natar Petun-Tono, kolheta hare no distribui ekipamentus agrikola no peskas ba povu Oecusse.
Serimonia kolheta hare no distribuisaun ekipamentus Agrikola no peskas hahu ho simu bainaka husi governu sentral, liu husi Ministru interinu Agrikultura, Pekuaria, Peskas no Floresta, Domingos da Conceicao dos Santos, Atual Sekretariu Estado Peskas, akompanha husi Diretor Jeral ho Diretor Nasional MAPPF nian ho Sekretariu Rejional Serbisu Administrasaun no Finansa, Salvador da Cruz nuudar mos Prezidente Interino Autoridade Rejiaun Administrativa Espesial Oecusse-Ambeno (PA-RAEOA) ho Diretor Rejional sira.
Tuir Domingos da Conceicao dos Santos, Atual Sekretariu Estado Peskas hafoin lansa kolheta hare no distribui ekipamentus Agrikola iha Natar Petun-Tono, Suku Cunha, Postu Administrativu Pante Makassar RAEOA, ba STL, Kuarta (10/06/2026) katak, serbisu ida nee todan, maibe serbisu hotu-hotu tenke esforsu.
“Governu TL liu husi MAPPF, hau nuudar Ministru Interino MAPPF Mai Oecusse, halo distribuisaun ekipapentus Agrikola iha Oecusse, ho objetivu maka oinsa ita atu konsentra ba hasae produsaun aihan iha rai laran, hodi resposta ba demanda konsumu nasional no lokal iha Oecusse nian. Ita espera katak ho distribuisaun ekipamentus agrikola modernu sira nee, bele fo nafatin korajen ba ita nia toos no natar nain sira nomos povu agrikultor sira atu bele serbisu makaas, hodi hasae produsaun,” dehan Ministru Interino MAPPF, Atual Sekretariu Estadu Peskas, Domingos da Conceicao dos Santos.
Nia haktuir tan katak, liu husi distribuisaun ekipamentu agrikola modernu hirak nee, esperansa katak, bazeadamente bele redus ona importasaun husi rai liur, ida nee esperansa husi estadu TL, lao neneik maibe konserteza tenke lao ba bebeik para bele fo resposta imediata ba situasaun real iha rai laran.
Iha biban nee, Ministru Interino MAPPF, Domingos husu ba agrikultor sira neebe maka utiliza ekipamentus sira nee ho responsabilidade no kuidade ekipamentus sira nee ho didiak atu bele uza ba tempu naruk no fo benefisiu ba povu agrikultor sira.
Tuir Prezidente Interino, Salvador da Cruz, atual Sekretariu Rejional Serbisu Administrasaun no Finansa RAEOA, agradese ba governu Sentral liu husi MAPPF neebe mai hamutuk ho povu Oecusse, halao lansamentu kolheta hare iha natar Petun-Tono nomos entrega ekipamentu agrikola no peskas ba povu agrikola Oecusse, hodi hasae produsaun aihan no hadia povu nia vida moris ekonomia uma laran.
“Hau lori prezidente Autoridade RAEOA no Povu Oecusse nia naran, hatoo benvindo no agradesementu wain ba governu sentral liu husi MAPPF neebe ohin mai Oecusse ho ekipa, entrega ekipamentus agrikola no peskas ba povu Oecusse, atu utiliza hodi hasae produsaun aihan iha rai laran, liu-liu iha Oecusse hodi responde konsumu nasional no rejional,” dehan nia.
Iha biban nee, Diretor Rejional Serbisu Agrikultura RAEOA, Jose Oki agradese ba governu sentral neebe maka mai Oecusse iha serimonia kolheta hare no entrega ekipamentus agrikola ba povu Oecusse, liu-liu ba grupo agrikoltor sira iha tinan 2026.
“Ami hakarak hatoo agradese MAPPF ho Sekretariu Estadu Peskas, neebe maka ohin reprezenta Ministru MAPPF disribui makina no ekiparmentu agrikola ba RAEOA iha potensialidade natar neebe luan, ho total area natar hamutuk 5.705 hektares. Ho esforsu no apoiu husi Autoridade RAEOA hodi hadia no rehabilita kanal irigasaun sira, too agora konsege utiliza ona area hamutuk 2.862 hektares, neebe benefisia ba 9.711 uma kain,” dehan nia.
Iha biban nee, nia informa katak, sei iha area natar hamutuk 2.845 hektares neebe seidauk utiliza ba area Cultivasaun. Tanba nee, Autoridade RAEOA liu husi servisu regional agrikultura, kontinua halo esforsu, iha epoka Primeiru tinan ida nee, agrikultores sira konsege realiza kultivasaun area natar hamutuk 1.802 hektares, kompostu husi Sistema PAD konvensional 800 hektares, Sistema tradisional 372 hektares.
“Iha epoka daruak neebe sei hahu entre fulan Junhu no Julhu, ami prepara ona area kultivasaun hamutuk 1.060 hektares. Koilheta neebe ohin loron ita halo simbolikamente iha Natar Petun Tono, hamutuk 45 hektares ho benefisiariu 157 uma-kain. Ho nia Produktividade 4,3 tonelada Por hektare, ho utilizasaun variedade hare Impari 32, neebe hatudu katak ho jestaun diak, apoiu tekniku no utilizasaun teknolojia apropriada, ita bele aumenta produsaun no produtividade agrikultura iha RAEOA, tanba nee ami agradese Ministru Interino MAPPF, neebe Entrega tan makina no equipamento agrikola ba Autoridade RAEOA, hodi reflete kompromisu Governu atu promove modernizasaun setor agrikultura no hasae Produsaun no produtividade agrikola iha RAEOA,” afirma Oki.
Makina no ekipamentu agrikola neebe ohin entrega mak Trator boot 2 unidades; Mini hand trator 10 unidades, Makina kuda hare 5 unidades Makina kua hare 2 unidades, Ekipamentu sira nee sei ajuda agrikultor sira hodi reduz termpu servisu, aumenta efisiensia servisu agrikultores sira nian.
Entrega ekipamentus Peskas
Hafoin entrega ekipamentus agrikola, Ministru Interino MAPPF, atual Sekretariu Estadu Peskas, Domingos da Conceicao dos Santos ho Sekretariu Rejional serbisu Admnistrasaun no Finansa RAEOA, Salvador da Cruz ho Diretor nasional no rejional sira, kontinua oferese tan ekipamentus peskas ba grupo peskas sira iha lotas de peskas Oesono, Suku Costa, Postu Administrativu Pante Makassar, RAEOA.
Fasilidade peskas neebe entrega ba grupo peskas sira iha Oecusse mak hanesan, Beiro Fibra de Vidru unidade 8, Makina Hyda 15 Hp unidade 8, tali 8mm, 8 unidade, Tali 10mm unidade 8, Live Jaket marka atunas 28 unidade, Ankora 8, Purautan Matan ho fibra do Vidro unidade 8, kompletu ho assesores kompletu, entrega husi Ministru Interinu MAPPF atual Sekretariu Estadu Peskas, Domingos da Conceicao dos Santos ho Prezidente Interino Autoridade RAEOA, Salvador da Cruz, atual Sekretariu Rejional Serbisu Administrasun no Finansa RAEOA.
Serimonia entrega ekipamentus peskas no ekipamentus agrikola realiza liu husi asina dokumentus termo entrega husi Ministeriu MAPPF ba Grupu Agrikultor no peskas sira iha Oecusse.
(jos)
