AMBENO, STLTIMORLESTE.com – Assosiasaun Easy Learning English (ELE) hetan novidade alegria no kontente tanba hetan fundus orsamentu husi ninia parseiru privadu sira husi Australia neebe oferese osan husi Bill Passey ho Richard Mounsey ho ninia kolega sira iha Australia, atu konstrui fatin aprende lian ingles ba estudante no labarik kiik oan sira inklui ema boot atu tulun dezenvolve nuudar ponte komunikasaun ba mundu.
Prezidente Fundador Assosiasaun ELE, Salomao Mesak ba STL, iha Bairru Postusika, Suku Lifau, Postu Administrativu Pante Makassar RAEOA, Tersa (09/06/2026), espresa sentimentu ksolok no agradese ba parseiru privadu sira husi Australia, ho naran Bill Passey ho Richard Monsey hamutuk ho sira nia kolega sira neebe maka apoiu fundus orsamentu hamutuk US$ 3700 atu konstrui fatin hanorin neebe durante nee inisiativa husi Assosiasaun Ele nuudar Oecusse oan husi Pasabe neebe iha interese dezenvolve kapasidade no konhesimentu ba foin sae Oecusse oan sira nomos la taka dalan ba foin sae husi munisipiu seluk neebe maka iha intese atu kapasita aan ho lingua ingles atu nunee bele kompete iha merkadu internasional nomos bolseiru estranjeiru.
“Durante nee, ami kapasita ita nia joventude no foen sae sira, inklui labarik kiik oan sira liu husi kursu lian Ingles, tanba nee durante tinan ida ho balun ona, ejistensia assosiasaun ELE kapasita maluk foen sae sira ba lian Ingles, maibe tuur deit iha Baraka neebe tali tahan mos komesa dodok ona, entaun ami komunika malu ho maluk sira husi rai laran no rai liur, liu-liu Australia, konsege responde ami nia preokupasaun hodi oferese fundus atu hadia ami nia Baraka nee, atu kontinua kapasita ami nia maluk Timor oan sira, liu-liu foin sae sira ho kursu lian Ingles nomos atividades seluk-seluk tan, hodi prepra sira hasoru merkadu trabalhu nomos oportunidade bolsu estudu,” dehan nia.
Nia haktuir tan katak, Assosiasaun ELE simu apou fundus privadu husi Richard Monsei ho nia espoza nomos husi sira nia kolega diak ida naran Bill Passey husi Australia, apoiu fundus ba Assosiasaun nee atu halo ninia salaun de aula boot ida, atu fasilita treinamentu ba alin foin sae sira neebe mai tuir kursu partime no full time bele estuda ho diak.
“Durante nee, ami nia prosesu aulas, halo deit ho tali tahan deit, lao kuaze tinan 1 ho balun ona no liu husi kursu ida nee, foin sae barak maka hakarak atu tuir treinamentu lian ingles maibe ami mak hateten sira katak, ami sedauk simu ema barak tanba fatin maka sedauk sufisiente, tanba nee ami agradese ba publiku tomak, alin kiik sira ho foin sae sira neebe maka hakarak mai tuir kursu lian ingles, ami sei loke tan iha fulan Agostu, bain hira konstrusaun fatin nee remata, ba maluk sira neebe maka hakarak tuir kursu full time, bele mai rejistu,” dehan Salomao.
Nia haktuir tan katak Assosiasaun ELE nee, atu loke ba Oecusse oan tomak, liu-liu kiik oan sira, presiza prepara sira nia future liu husi lingua ingles, maluk sira neebe tuir formasaun iha nee, laos atu hetan kedan serbisu maibe kuandu hatene ona lingua ingles, bele buka dalan para hetan serbisu.
Iha biban nee, João Bano Suni nuudar Eis Xefe Gabinete Autoridade dehan, kursu lingua ingles nee importante atu konekta aan rasik ba mundu tomak.
“Ita hotu hatene katak lingua ingles nee, lingua ba mundu tomak, tanba nee apresia ho Assosiasaun ELE neebe kapasita maluk foin sae sira ho voluntariamente tuir kursu lingua ingles, tanba dadaun nee merkadu serbisu hein hela atu serbisu iha rai liur, alende nee bele kapasita foin sae sira ho lian ingles, atu prepra sira sai lider iha futuru nasaun TL, espesialmente iha Oecusse,” dehan nia.
Tuir observasaun STL, Richard Monsey ho nia espoza reprezenta ninia kolega sira husi Australia ofisialmente entrega osan ba prezidente fundador Assosiasaun ELE, Salomao mesak neebe akompanhia husi Xefe Gabinete Autoridada RAEOA, Merito de Araujo ho profesor voluntariu sira inklui foin sae sira hamutuk 30 resin maka tuir hela kursu lingua Ingles.
(jos)
