DILI, STLTIMORLESTE.com – Komunidade Suku Santa Cruz, Postu Administrativu Nain Feto, Munisipiu Dili, parte balun durante nee sempre halerik bee-moos, tanba kanalizasaun bee-moos husi Bee Timor Leste Empreza Publiku (BTL,E.P) iha area suku refere, bee mai tuir tempu ka oras.
Kestaun nee hatoo husi Xefe Suku Santa Cruz, Marciano Juvinal ba STL iha nia knaar fatin Sede Suku Santa Cruz, Tersa (16/6/2026).
Tuir Marciano problema bee-moos iha Suku Santa Crus tuir observasaun autoridade local komunidade barak uza bee-moos husi BTL,E.P maibe bee mai tuir nia tempu, pior liutan kuandu mosu barailha ruma husi sistema kanalizasaun bee-moos, bee bele la mai ho tempu naruk hodi prezudika komunidade sira nia moris. Tanba nee, problema neebe komunidade Santa Cruz hasoru durante nee konsidera bee-moos sai hanesan preokupasaun boot, ho nunee nuudar autoridade sempre hatoo komunidade nia halerik ba governu.
Iha biban nee xefe suku informa Suku Santa Cruz iha aldeia 10 ho total populasaun 8.000 resin, maibe husi dadus sira nee dalaruma bele menus husi nee no dalaruma bele sae liu husi nee, tanba komunidade sira balu tama, balu sai, balun mate, balu moris.
Antes nee, Prezidente Autoridade Munisipiu Dili, Francisco dos Santos dehan, bee-moos importante tebes ba ema hotu-hotu nia moris tanba nee bainhira kanalizasaun bee-moos iha fatin ruma aat ka kotu tanba projetu alargamentu Estrada husu parte BTL.EP buka resolve kedas.
Tanba bee-moos importante ba ita ema nia moris nee duni nuudar Autoridade Munisipiu Dili sempre haraik-aan ba BTL,E.P atu responde ho lais ba preokupasaun konsumidores bee-moos. “Ita labele hatudu liman ba malu maibe haree ba ita nia resposabilidade hodi ezerse, atu nunee hodi bele servi povu ida nee ho diak no dignu,”katak Francisco.
Tuir Francisco moris nee ezensia tebes ba bee-moos nee duni instalasaun bee-moos husi parte balun karik hetan estragus tanba projetu alargamentu estrada, governu liu husi BTL.EP buka alternativa hadia lalais hodi fornese bee-moos ba konsumidores.
(ger)
