DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Dias Ximenes sei fahe esperiensia Indeks Timor Leste (TL) nian ba Malazia iha selebrasaun loron Liberdade Imprensa Malazia nia.
Sekretariu Estadu Komunikasaun Sosial (SEKOMS), Expedito Dias Ximenes ba jornalista sira iha Aeroportu Internasional Nicolau Lobato, Komoro, Kuarta (17/06/2026) hatete, ohin nia viajen ba Malazia tanba hetan konvite husi Ajensia Notisia Bernama hodi partisipa loron Liberdade Imprensa Malazia nian neebe sei realiza iha loron 20 fulan junho tinan nee.
Iha loron importante nee Sekretariu Estadu Komunikasaun Sosial sei fahe esperiensia Timor Leste nia tuir indeks iha forma Nasional, Rejional no Internasional.
“Ohin viajen ba Malazia hetan konvite husi news Ajensia Notisia Bernama ho ministerium imformasaun Malazia nia atu ba asiste sira nia loron nasional Liberdade imprensa iha penan, aproveita iha oportunidade nee iha loron Liberdade imprensa nee News Ajensia Bernama sei asina akordo ho ajensia Tatoli neebe hau ba ho Prezidente Tatoli ho Vise Prezidente Tatoli ohin ba, sira nia programa loron nasional Liberdade imprensa nee sei monu iha dia 20 pois dia 20 nasaun sira neebe iha ASEAN sei asiste Timor Leste mos hetan konvite atu hatoo diskursu loron nasional Liberdade Imprensa Malazia nia,” dehan Sekretariu Estadu Komunikasaun Sosial.
Iha loron Liberdade Imprensa Malazia saida mak Sekretariu Estadu Komunikasaun Sosial (SEKOMS) sei koalia iha neeba? hatan ba kestaun nee Expedito dehan sei fahe esperensia Timor Leste nia tuir indeks TL nia forma nasional, forma rejional no forma internasional.
“Nee husu esperiensia Timor Leste nia oinsa iha Liberdade Imprensa iha nee, hodi fahe mos iha Malazia, ita sei hatoo katak tuir Konstituisaun Republika artigu 40 no 41 Governu no estadu ida nee garante 100% Liberdade imprensa iha Timor Leste, durante nee lao diak, ita nia liberdade imprensa iha Timor Leste lao diak asesu imformasaun iha Timor Leste sidadaun hotu hotu asesu ba imformasaun iha TL mos lao diak, no serbisu hamutuk nafatin ho konsellu Imprensa atu nafatin fo formasaun ho karakter investigativu ba kolega jornalista sira,” dehan nia.
Sekretariu Estadu hatete, IX Governu Konstitusional nafatin fo atensaun ba iha formasaun ba jornalista sira, servisu hamutuk ho Konselhu Imprensa, no foin daudaun KI halao hela formasaun karakte investigativu iha munisipiu sira inklui jornalista sira iha nasional.
Nia hatete, Liberdade Imprensa Timor Leste nia hatudu duni katak seidauk iha jornalista ida hetan akuzasaun ba tribunal, seidauk tama iha prizaun, ida nee hatudu katak Liberdade imprensa Timor Leste lao diak, no Indeks tinan ida nee sae oituan husi 39-30 ida nee esforsu nafatin atu Liberdade imprensa hanesan karakter demokrasia hametin no habelar liu tan demokrasia iha Timor Leste.
Sekretariu Estadu Komunikasaun sosial hatete sorumutu nee halao durante loron rua husi loron 20 no sei fila hikas mai Timor Leste iha 22 Junhu.
(eme)
