DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba prosesu primeiru interogatoriu, deside aplika medida Prizaun Preventiva ba arguidu ho inisial JP.
Arguidu lori mai iha Tribunal, Ministeriu Publiku promove arguidu ho krime Arma Branka no mos krime omisidiu ho Forma Tentada, tanba deskonfia lori samurai taa vitima Jose Salsinha Trindade, iha Aldeia Poepu, Suku Poetete, Postu Administrativu Ermera Vila, Munisipiu Ermera.
Iha prosesu nee, Juiza turnu halo tiha identifikasaun ba arguidu, iha faze alegasaun Ministeriu Publiku neebe reprezenta husi Prokurador Ricardo Leite, husu Tribunal atu aplika medida Prizaun Preventiva ba iha arguidu.
Enkuantu husi parte defeza arguidu nian, Defensor Publiku estajiadu Deomentino Morais husu Tribunal atu aplika medida Aprezentasaun Periodika ba arguidu.
Rona tiha alegasaun, ikus mai Juiz turnu deside no afavor ba iha alegasaun Ministeriu Publiku nian, hodi hatun despaisu aplika medida Prizaun Preventiva ba iha arguidu.
Hafoin despaisu tun, arguidu lori kedan ba iha Prizaun Bekora.
Tuir informasaun neebe iha katak, akontese problema nee husi deskonfia malu. No problema primeiru akontese iha loron 13/06/2026 iha Aldeia Rematu, Suku Poetete, Postu Administrativu Ermera Vila, Munisipiu Ermera, arguidu hamutuk ho nia kolega sira baku deit vitima.
No tuir fali mai iha loron 14/06/2026, akontese iha Aldeia Poepu, Suku Poetete, Postu Administrativu Ermera Vila, Munisipiu Ermera, arguidu lori katana samurai metru ida taa iha vitima nia kanuruk, liman, ain, ulun.
No oras nee daudaun vitima baixa hela iha Hospital Nasional Guido Valadares (HNGV).
Prosesu primeiru interogatoriu nee prezide husi Juiz estajiada Maria da Silva Pinto, Ministeriu Publiku reprezenta husi Prokurador Recardo Leite, arguidu hetan asistensia legal husi Defensor Publiku Estajiadu Deomentino Morais.
(ter)
