AMBENO, STLTIMORLESTE.com – Maski materiál konstrusaun sira ne’ebé transporta husi Dili ba Oecusse, Rejiaun Administrativa Espesiál Oecusse-Ambeno (RAEOA), loja Zelia kontinua mantein presu fa’an hanesan antes, sein aumenta folin ba konsumidór sira.
Diretora Loja Zelia, Zelia da Silva, hateten ba STL iha loja ne’ebé lokaliza iha Bairru Santa Rosa, Suku Costa, Postu Administrativu Pante Makasar, Kuarta (04/11/2026), katak to’o agora presu materiál konstrusaun sira kontinua estável, inklui semente no besi konstrusaun.
“Ami nia presu semente saku ida kontinua US$ 4, enkuantu materiál konstrusaun seluk, hanesan besi konstrusaun, kontinua fa’an tuir presu ne’ebé ami aplika durante ne’e. Ami seidauk aumenta presu, nafatin normal hanesan uluk,” dehan Zelia.
Nia esplika katak, loja ne’e la’ós de’it fa’an materiál konstrusaun, maibé mós fornese produtu eletróniku, hanesan lampu no altifalante, roupa, no ekipamentu uma laran, inklui bikan, kanuru no sasán dapur seluk, ho presu ne’ebé kontinua estável.
Zelia mós konfirma katak materiál konstrusaun sira ne’ebé fa’an iha loja ne’e mai husi Dili, liuhusi transporte marítimu ho Ro-Ro Berlin Ramelau no Ro-Ro Success Irmão Timor. Maski nune’e, prosesu transporte entre Dili no Oecusse seidauk sai razaun ba loja atu aumenta presu sasán sira.
Além husi atividade komersiál, Zelia mós kontribui ba kriasaun oportunidade empregu ba komunidade lokál, liuhusi negósiu ne’ebé nia harii iha Oecusse.
Nia esplika katak durante hala’o negósiu iha Oecusse, konsege harii ona loja rua, mak Loja Zelia iha Bairru Santa Rosa, Suku Costa, ne’ebé emprega traballadór lokál na’in 7, no Estar Sesu iha Bairru Padiae, Suku Lalisuk, ne’ebé fó oportunidade servisu ba traballadór na’in 6.
Nune’e, negósiu rua ne’e hamutuk emprega Oecusse oan na’in 13, ne’ebé hetan oportunidade servisu no rendimentu mensal atu ajuda sustenta nesesidade família ida-idak.
Zelia hato’o agradese ba traballadór sira ne’ebé kontinua servisu hamutuk ho loja rua ne’e. Nia konsidera katak oportunidade empregu iha rai rasik importante tebes atu ajuda komunidade lokál no hametin ekonomia família sira.
Sentimentu ne’e mós hetan konfirmasaun husi Elisabet Falo, traballadóra Loja Zelia, ne’ebé hateten katak nia sente kontente tanba bele hetan servisu iha fatin moris rasik, sein presiza buka empregu iha Dili.
“Hau nu’udar Oecusse oan ne’ebé servisu iha Loja Zelia, sente kontente tanba hetan oportunidade servisu di’ak iha loja ne’e. Hau agradese ba patraun Zelia ho nia kaben tanba harii negósiu iha Oecusse no fó oportunidade ba ami atu servisu iha rai rasik. Kada fulan ami mós bele hetan saláriu atu sustenta família,” dehan Elisabet.
Tuir observasaun STL iha Loja Zelia, presu semente saku ida mak US$ 4, bainhira konsumidór rasik lori sasán ne’e. Maibé, bainhira loja mak responsabiliza atu lori semente ba uma konsumidór nian, presu aumenta US$ 0,25 atu kobre gastu mina ba transporte.
Loja Zelia lokaliza iha Bairru Santa Rosa, Suku Costa, Postu Administrativu Pante Makasar, RAEOA, no sai nu’udar ezemplu negósiu lokál ida ne’ebé, além husi fornese nesesidade komunidade, mós kontribui ba kriasaun empregu ba Oecusse oan sira.
(jos)
