DILI, STLTIMORLESTE.com – Orsamentu ba projetu reabilitasaun estrada Kilometru (Km) 9 resin iha Postu Administrativu Soibada, Munisipiu Manatuto, segredu, tanba la sita montante orsamentu iha kuadru projetu.
Administradora Postu Administrativu Soibada, Terezinha da Costa Moniz hatete katak, projetu reabilitasaun estrada iha area Soibada ho total aproximadu Km 9+791.31 responsabiliza husi kompanhia internasional ida neebe lansa ona iha tinan 2024. Tuir kontratu, durasaun servisu projetu refere previstu durante tinan ida resin. Maibe, too agora parte administrasaun lokal seidauk hatene lo-loos montante orsamentu ba projetu ne’e, tanba informasaun refere la tau iha kuadru projetu neebe instala iha fatin servisu.
“Orsamentu ba direita deit iha ministeriu, tanba kuadru neebe sira tau mos la tau orsamentu ida. Maibe iha tempu lansamentu fo sai ona valor orsamentu, maibe hau la akapta tauk fo sala,” hateten Administradora Postu Soibada, Terezinha da Costa Moniz, ba STL liu husi telefone, Tersa (16/06/2026).
Administradora relata liu husi WhatsApp ho fotografia kuadru projetu reabilitasaun estrada refere implementa ho numeru kontratu Tender/021/MOP-2023, dirasaun tempu servisu loron 540 neebe hahu iha loron 26 Julhu 2024 too loron 26 Janeiru 2026 implementa husi kompanhia Shanghai Construction supervizaun husi Ministeriu Obras Publikas rasik, maibe la inklui ho montante orsamentu neebe aloka ba projetu refere.
Tuir kontratu neebe iha, servisu lo-loos termina ona, maibe too ona fulan Junhu 2026 projetu refere seidauk finaliza no seidauk iha progresu diak, tanba servisu lentu ho razaun impata husi iklima.
“Ami nia rekomendasaun ba Governu, ami hakarak data neebe tau iha papan projetu nee ami hakarak tenke implementasaun tuir data neebe iha, razaun iklima no rai halai, mais ami hakarak bailoron 2016 nee estrada nee ami bele diak ona,” Terezinha rekomenda.
Administradora nee rekonhese, mezmu projetu reabilitasaun estrada nee atual kontinua lao, maibe lao lentu liu, tanba razaun mak iklima atual iha Soibada la permite atu kompanhia aselera servisu. Maibe haree ba progresu servisu neebe lentu, Autoridade Postu informa ona ba Ministeriu Obras Publikas (MOP) liu husi nia Vise Ministru too ona fatin haree kondisaoens sira no fo ona orientasaun ba kompanhia atu aselera servisu.
Nunee iha tinan ida nee bele finaliza projetu refere hodi komunidade Soibada bele asesu kondisaun estrada neebe diak, tanba tinan naruk ona komunidade Soibada infrenta kondisaun estrada aat no grave.
Aleinde nee mos projetu reabilitasaun estrada lentu fo impaktu ba projetu kanalizasaun bee moos husi BTL, tanba projetu reabilitasaun estrada refere seidauk hotu, projetu kanalizasaun bee moos sei paradu hela.
“Estrada nee tarde nia impaktu mos ba BTL nia implementasaun iha kedas 2022 too agora seidauk hotu, se estrada nee tarde BTL mais tarde liu tan fali, tanba kanu distribuisaun iha kedas lokasi implementasaun estrada, entaun estrada diak tiha mak sira atu halo kanalizasaun,” Terezinha informa.
Nia esplika, projetu kanalizasaun bee moos refere husi bee matan Suku Fatumakerek nian atu distribui ba komunidade sira, edifisiu publiku no igreja Soibada, tanba impaktu husi projetu reabilitasaun estrada neebe seidauk finaliza atu BTL kontinua instala kanu distribuisaun bee nian ba komunidade sira inklui edifisiu publiku inklui igreja Paroquia Soibada rasik.
(tom)
