BAUCAU, STLTIMORLESTE.com – Vitima dezastre naturais (DN) hamutuk 100 resin iha Munisipiu Baucau neebe naran elimina husi lista material rekuperasaun tinan 2026, 53 submete hikas ona karta reklamasaun ba Autoridade Protesaun Sivil (APC) Munisipiu Baucau.
Komandante operasaun APC Munisipiu Baucau, Francisco Viana Freitas aprezenta, iha lista vitima dezastre naturais neebe APC Munisipiu Baucau elabora relata ba Nasional hamutuk 300 resin atu hetan material rekuperasaun husi Governu, maibe nain 185 mak hetan direitu ba material rekuperasaun enkuantu nain 100 resin elimina husi lista material rekuperasaun 2026 nee, tanba nee seluk neebe naran elimina balu submete ona karta reklamasaun iha APC Munisipiu Baucau.
“Agora daudaun dadus sira neebe halo reklamasaun hamutuk uma kain 53. Reklamasaun sira nee ami kanaliza tiha ona ba Nasional oinsa atu fo resposta,” hateten Komandante operasaun APC Munisipiu Baucau, Francisco Viana Freitas ba jornalista sira iha knaar fatin Tirilolo Baucau, Kinta (18/06/2026)
Nia esplika, lista vitima dezastre naturais hamutuk 300 resin neebe submete ba Nasional no elimina 100 resin, tanba re-verifikasaun husi Nasional haree husi kondisoens uma estragus sira direita iha terrenu, iha neebe nota uma balu laos uma hela fatin, maibe dapur no seluk neebe mak uma hela fatin maibe hetan eliminasaun nee, balu submete ona karta reklamasaun.
Nia sublina, mezmu APC Munisipiu Baucau simu ona karta reklamasaun no diriji ona ba Nasional, maibe dezisaun ba tempu re-verifikasaun seidauk hetan husi Nasional, tanba nee husu vitima dezastre naturais neebe la satisfas ho elimasaun refere bele submete karta reklamasaun.
“53 nee automatikamente ita sei tun fali haree halo re-verifikasaun, maibe laos ami mesak hein desizaun husi Nasional. Simu reklamasaun nee too bainhira ita la hatene mais lao nafatin,” Francisco komenta
(tom)
