DILI, STLTIMORLESTE.com – Daudaun nee kareta nain balun la uza sira nia kareta hodi halo movimentu bá mai hanesan baibain antes mina folin sei normal, nunee balun uza deit motor hodi bá servisu no kareta rai deit iha uma hodi uza bá tempu neebe importante deit.
Kareta Nain Terezinha Castro hatete, mina folin sae no karun, kareta para deit iha uma. Ba servisu uza deit motor, nunee mos tula labarik sira ba eskola. Dader no loraik depois fila husi servisu hamanas deit kareta maibe para deit iha fatin. So loron Sabado no Domingo mak lori sai, maibe sekuando iha asuntu importante ruma hanesan lia ruma iha familia no atu sosa ruma mak lori sai, se lae para deit iha uma.
“Mina folin sae halo ita povu kiik dada Iis, atu hanoin labarik sira nia eskola, Han hemu lor-loron nian seidauk tan iha lia moris no lia mate, tanba Ita Timor Nia kultura nee Laos hanesan malae sira nian, maske laiha liu maibe labele halo mamuk. Neebe ho folin mina sae nee, halo ita osan laiha atu ense mina bá kareta hodi halo movimentu lor-loron. Sai dala ida rua iha emana Ida bele, maibe atu lor-loron hanesan uluk nee, gora susar liu,” dehan nia bá STL iha Komoro, Kinta (18/06/2026).
Nia katak, antes nee semana ida ense deit US$ 20 to 25 bele uza ba semana ida ou selae resin tan, mais agora lae ense US$ 20, halai la too semana ida, mina hotu mamuk ona. Neebe laiha asuntu importante nee para deit lai, hanesan iha acara familia ou lao dok ruma Mak uza kareta. Bá servisu no lori oan Ira bá eskola nee lori deit motor.
Nunee mós Kareta Nain, Filipi da Costa katak, nia kareta neebe uza bá servisu no tula oan sira bá eskola, agora tanba mina folin sae tau deit iha uma, mai servisu uza deit motor para labele gastu no poupa osan. Sekuandu uza lor-loron hanesan agora mina folin sae, osan modo nian bele laiha ona.
Lor-loron atu kastigu aan ho labarik sira han maran deit mos ladiak, entaun kareta mak para deit lai. Hanesan iha tempu importante ruma mak uza, tempu servisu uza deit motor, Sabado no Domingo mak lori sai dala ida, nunee kareta labele aat.
“Haree bá situasaun araska nee, husik kareta para deit lai iha uma. Mai servisu no tula labarik sira bá eskola nee uza deit motor, Sabado no Domingo mak uza kareta bá asuntu importante sira. Neebe ita ema nee loo tuir deit situasaun no kondisaun moris, labele obriga aan atu hanesan ho ema seluk,” dehan nia.
Nia hatutan, espera governu ida bele bele halo esforsu hodi mina folin nee bele tun fali, para nunee povu kiik sira neebe moris ho naton labele halerik bá sasan folin sira.
(dom)
