BAUCAU, STLTIMORLESTE.com – Autoridade Suku Lelalai, Postu Administrativu Matebian, Munisipiu Baucau, tinan nee hetan orsamentu rihun US$ 32 husi Programa Nasional Dezenvimentu Suku (PNDS).
Xefe Suku Lelalai, Salamão Fraga Fernandes aprezenta, kada tinan Autoridade Suku Lelalai hetan orsamentu regular husi PNDS ho montante rihun US$ 40 ba leten, maibe tinan nee hetan redusaun boot, nunee planu prioridade neebe atu kanaliza bee moos ba komunidade sira tenke kansela, tanba orsamentu la sufisiente atu halo perfurasaun no kanalizasaun bee moos ba komunidade sira.
“Tinan nee ami hetan rihun US$ 32, entaun ami halo kampu multi funsaun, tanba tinan oin ami sei realiza eventu 20 Maiu loron Nasional nee iha ami nia Suku, entaun ami prepara fali kondisaun nee,” hateten Salamão ba STL iha Vila Nova Baucau, Sesta (19/06/2026).
Nia esplika, aleinde kampu multi funsaun refere prepara ba selebrasaun loron 20 Maiu 2027, nia objetivu seluk mos atu prepara fini desportiva iha area futebol no futsal nian, tanba Postu Administrativu Matebian liu-liu Suku Lelalai iha joven talentu futebolista, maibe durante nee menus kampu atu sira utiliza hodi treina, nunee bainhira konstrusaun kampu multi funsaun refere hahu no finaliza bele ajuda ona joven sira bele utiliza hodi treina iha kualker tempu.
Nia sublina, preparasaun ba konstrusaun kampu multi funsaun refere parte Autoridade Suku hahu ona loke koutasaun no tempu badak sei halo avaliasaun ba koutasaun molok deside tempu ba implementasaun projetu.
“Projetu nee nia orsamentu ba konstrusaun hamutuk rihun US$ 32, semana oin ita halo avaliasaun koutasaun fulan ida nee nia laran ita bele implementa ona,” Salamão komenta.
Suku Lelalai iha Aldeia haat mak hanesan Dauaduca, Dessa, Maluro, no Ossoliro ho total liu 2.000 husi uma kain 521 resin.
(tom)
