DILI, STLTIMORLESTE.com – Prezidente Republika (PR) apresia ba ezistensia Aero Dili lori bandeira Timor Leste (TL) semo iha kalohan leten ba mundu.
Prezidente Republika Jose Ramos Horta hatoo lia hirak nee liu husi nia diskursu bainhira lansa Voo foun Dili- Darwin husi Aero Dili iha Aeroportu Internasional Nicolau Lobato, Komoro, Dimingu (21/06/2026).
Prezidente Republika lansa voo foun Dili-Darwin (Australia) husi kompania Aero Dili nuudar pasu importante ida ba konektividade aero entre Timor Leste ho nasaun vizinu Australia.
“Apresia ba ezistensia kompania Aero Dili nuudar Timoroan nian neebe lori bandeira Timor-Leste semo iha kalohan leten ba mundu nuudar orgulhu ida ba Timoroan hotu. Tanba nee, dezde inísiu Prezidente Republika foti pozisaun ida atu fo nia apoiu tomak ba inisiativa neebe Aero Dili halo,” dehan PR Horta.
Prezidente Ramos Horta husu atu Aero Dili kontinua fo nia prestasaun servisu ho diak hodi aumenta rute barak liu tan, liu-liu rute sira ba nasaun iha ASEAN nian.
Rute Dili-Darwin sai ponte importante ida atu fasilita liutan movimentu ema nian hodi hametin parseiria sira, haburas vida ekonomia, no atrai turista sira mai Timor Leste. Tuir planu operasional, rute foun ida nee sei halao semana ida dala rua, entre domingu no tersa-feira iha oras tuku 08:00 oras Timor-Leste nian.
Bainhira too iha Aeroportu Darwin, Prezidente Republika agradese ba autoriedade Norte Australia nian neebe bele simu voo husi Aero Dili no permite kompania timoraon nian atu halo operasaun iha Ausralia, nuudar nasaun estratejiku ba Timor Leste.
(eme)
