DILI, STLTIMORLESTE.com – Alin husi Saudozu Francisco Guterres Lu-Olo, Domingos Guterres hateten, nuudar familia husi Antigu Prezidente Repúblika Francisco Guterres Lú-Olo sente triste ba falesimentu Dr. Francisco Guterres Lú-Olo.
“Ita hotu hatene ita nia maun, ita nia aman laiha ona, neste momentu ami familia mos triste no agradese ba solidariedade tomak ba parte Governu ba parte partidu no ba povu tomak nia apresiasaun boot ba ita nia aman ida nee nia mate, triste boot ba família, triste boot mos ba nasaun, triste boot ba povu tomak,” hatete Domingos Guterres ba jornalista sira iha Saudozu Francisco Guterres Lú-Olo nia rezidensia Farol, Segunda (22/06/2026).
Nia haktuir, Saudozu Francisco Guterres Lú-Olo hakotu iis iha Hospital Malázia iha tuku 10:00 oras Malázia nian.
Nia esplika, família halo ona koordenasaun ba transasaun kadaver Saudozu Lú-Olo nia mate isin no konfirmadu husi Malázia mai Dili Timor Leste, Tersa aban (23/6).
“Aban mak sai, too iha Timor nia orariu tomak seidauk iha data fiksa,” nia deklara.
Alin husi Matebian nee informa, prosesu funeral no sikuensia funeravel família sei hein desizaun husi Saudozu nia kaben.
Nia koalia, família daudaun nee seidauk hatene Saudozu nee moras saida too hakotu iis, ida nee mediku sira mak hatene.
“Neste momentu ami prepra deit kondisaun minimu hodi simu nia kadaver, ida ne’e mak halo hela dadaun nee,”nia hatutan.
Domingos hateten, Saudozu sai husi uma Farol ba trata nia saúde iha Hospital Nasionál Guido Valadares nunee Doutor sira haruka hodi kontinua halo tratamentu iha Malázia, nunee iha 23 Maiu nia sai husi Timor ba tratamentu iha Malázia.
Nia dehan, Saudozu la fo hatene ba família nia moras saida, tanba Saudozu rasik nia ema neebe karakter lakohi koalia barak.
“Ami simu nia mate, nuudar familia ami triste no ida nee nuudar familia hotu-hotu neebe iha laos família ida nee maibe kuaze povu tomak triste tanba nuudar ema líder ida”, nia katak.
Entretantu tuir observsaun STL iha rezisténsia Saudozu Lú-Olo iha Farol daudaun nee veteranu ativu sira iha instituisaun FALINTIL-Forsa Defeza Timor Leste (F-FDTL) no direjente Partidu FRETILIN segunda ohin, hahu hakat mai uma saudozu antigu Prezidente Repúblika Francisco Guterres Lú-Olo iha nia rezidensia Farol.
Depois veteranu ativu F-FDTL neebe mai iha rezidensia Saudozu Francisco Guterres Lú-Olo mak Lorenco José Cabral “Aquito Tanque de Gerra Direjente Partidu FRETILIN mak hanesan Adjuntu Sekretáriu Jerál partidu FRETILIN, Flavio Flávio Maria da Silva, Deputadu ba kada FRETILIN. Entidade sira nee hahu hakbesik aan ba mai iha rezidensia Francisco Guterres Lu-Olo iha ba segunda tuku 9:00 dader nee.
(jen)
