DILI, STLTIMORLESTE.com – Eis Tenente Jeneral Reformado Lere Anan Timur hatete, sente triste tanba Timor lakon ema diak ida no maluk luta nain ida, neebe fila sedu deit ba Nai nia kadunan Santo.
Eis Tenente Jeneral Reformado Lere Anan Timur hatoo lia hirak nee ba jornalista sira iha Farol, Segunda (22/06/2026).
Nia hatete, sente triste tanba lakon maluk luta nain ida neebe uluk hamutuk iha ai laran ho kompromisu ida katak mate ka moris hamutuk hodi lori rai nee ba hetan ukun rasik aan, maibe nia husik mundu nee sedu liu.
“Hau sente katak nia husik mundu ida nee sedu liu tanba defende funu ikus nia husik nia feen oan kiak maibe nia husik sedu liu, hau la tau problema ba partidu ka estadu, hau hanoin partidu no estadu ema barak atu hatuur iha neeba, maibe hau tau problema liu ba familia, hanesan mos saudozu sira seluk neebe la hamutuk ona ho ita,” dehan Eis Jeneral Reformado Lere Anan Timur.
Nia hatete, mate nee ema hotu la ses maibe sente triste tanba lakon ema diak ida iha familia nia laran, iha familia rezistensia nia leet, tanba uluk iha kompromisu ida katak mate ka moris hamutuk maibe ohin nia lao uluk ona husik hela familia rezistensia, maibe nuudar familia rezistensia luta nain nafatin reza ba nia klamar iha mundu seluk mos tau matan nafatin mai povu no familia.
Mensajen saida mak Eis Tenente Jeneral sei lembra durante ai laran hamutuk too mai ohin loron hetan idenpedensia nee? hatan ba kestaun Jeneral Reformado Lere dehan iha ai laran sira hotu iha komprimisiu ida deit mak mate ka moris ukun rasik aan, terus bele terus mate bele mate maibe hakarak mak ukun rasik aan ida nee kompromisu neebe iha luta ai laran.
Lere dehan, funu hotu sira nia papel nuudar forsa armadas, Guerileiru, Falintil, papel mak nafatin hamutuk hodi tau matan ba povu ida nee lolos Eis PR Lu Olo sei moris para hamutuk ho nia maluk no joven sira hodi lori rai nee ba dezenvolvimentu no hasai povu husi kiak no mukit.
“Hanesan hau dehan ita la ses husi mate, maibe nia sedu liu husi nia maluk no familia sira, hau lahatene estadu tau matan ba oan kiak kalae? maibe faluk no oan kiak barak mak ohin loron sira halerik ho mataben,” dehan Lere.
Lere konta katak nia hasoru malu ikus ho saudozu mak iha komemorasaun 20 maiu iha tasi tolu, no mensajen neebe sempre matebian husik hela mak presiza hamutuk para lori Partidu FRETILIN lao ba oin.
“Ema hanesan saudozu iha FRETILIN nee hela ami nain tolu deit ona bele dehan katak sekretariu Jeral partidu Fretilin Mari Alkatiri, Lu Olo ho hau, maibe Fretilin mak povu no povu mak FRETILIN,” dehan nia.
Aman luta nain hanesan Prezidente FRETILIN, Eis-Prezidente RDTL , Prezidente Asembleia Konstituente no eis-Prezidente Parlamentu Nasional Francisco Guterres Lu Olo, hakotu iis iha loron 21 Junu 2026, iha Ospital Prince Court, iha Kuala Lumpur, Malazia, hafoin halao tratamentu saude intensivu.
Saudozu Ninia mate partidu lakon boot ida iha FRETILIN laran, hanesan Prezidente FRETILIN ho nia maluk no Kompaneiru luta sira, neebe hamutuk mehi no harii Timor-Leste ida neebe livre, demokratiku no soberanu.
Hahu husi Kombatente, Komadante, sai Sekretariu Conselho Diretiva FRETILIN, Conselho Presidensial FRETILIN sai Prezidente FRETILIN, Prezidente Asembleia Konstituante, Prezidente Parlamentu Nasional, Prezidente Republika, Saudozu Francisco Guterres Lu-Olo lider ida sinples, integridade no firmeza iha nia prinsípiu polítiku no Estadista. Saudosu Heroi Francisco Guterres Lu-Olo ninia memoria, figura polítika no Estadista nudar ezemplar ba jerasaun foun sira iha nasaun Timor Leste.
(eme)
