DILI, STLTIMORLESTE.com – Falesimentu Eis Prezidente Republika no atual Prezidente Partidu FRETILIN, Francisco Guterres Lu Olo, lori sentimentu laran triste klean ba povu Timor Leste. Nuudar eroi boot ida neebe kontribui ona ba luta rezistensia tinan 24 nia laran, nia moris no dedikasaun sai aliserse fundamental ba harii nasaun RDTL.
Eis Deputadu Partidu Demokratiku (PD) no Konselhu Estadu, Virgilio Hornai fo sai nia agradesimentu no respeitu boot ba figura Lu Olo,. Tuir nia Lu Olo rai hela memoria neebe furak tebes ba jerasaun foun sira atu banati tuir, liuliu konaba prinsipiu dedikasaun determinante nian iha jornada luta no post restaurasaun independensia nian.
“Eroi Francisco Guterres Lu Olo sai ezemplu ba lider jerasaun foun sira hodi banati tuir nia simplisidade iha serbi Estadu. Nuudar Eis Prezidente Parlamentu Nasional no Eis Prezidente Republika, nia hatudu katak lideransa neebe loos mak serbi Estadu ho laran metin,”dehan Virgilio Hornai ba STL, Segunda nee (22/06/2026).
Virgilio hatoo katak durante okupasaun kargu publiku, Lu Olo hatudu hahalok neebe nakonu ho honestidade no humildade. Nia konsideira katak Lu Olo figura ida neebe hatene separa an husi konflitu interese, hodi garante katak para oder neebe nia okupa la benefisia nia an rasik ka familia, maibe atu serbi povu no nasaun.
Memoria neebe eroi nee husik hela, tuir Virgilio, sai hanesan motivasaun vivu ba jerasaun foun sira atu kontinua estafeta lideransa neebe naturalmente sei mai. Lu Olo mos nuudar Prezidente Partidu FRETILIN, iha papel importante tebes iha istoria nasaun nian, liuliu bainhira lidera Asembleia Konstituinte hodi estabelese Konstituisaun RDTL neebe ohin loron sai baze ba aliserse nasaun nian.
Iha oportunidade nee, Virgilio Hornai mos aproveita fo hanoin ba jerasaun katuas sira neebe sei hamutuk iha jornada nee. Tuir nia pasamentu husi figura boot nee bele sai momentu reflesaun ida ba jerasaun tuan sira atu buka malu hodi halo dialogu nasional.
“Nee tempu atu ita buka konsensus mutua konaba politika tranzisaun jerasional neebe solidu, no prosperu ba konsuta Estadu RDTL nian iha futuru,” Virgilio hateten.
Iha parte ketak, Jerasaun Patriota, Belarmino Soares Magno mos hatoo ninia sentimentu konaba pasamentu hudi eroi nasional nee. Belarmino hatoo katak falesimentu grande eroi Francisco Guterres Lu Olo nuudar lakon boot ida ba nasaun, no nia husu ba jerasaun foun sira atu nafatin valoriza legadu no sakrifisiu neebe eroi sira husik hela hodi hametin nafatin soberania RDTL.
Entretantu ho pasamentu nee, Timor-Leste lakon figura ida neebe didika nia an tomak ba patria, no nia legadu sei kontinua moris iha memoria povu nian nuudar eroi neebe simples, honestu, no laran metin ba interese nasional.
(car)
