DILI, STLTIMORLESTE.com – Feto mos iha direitu hola parte iha eleisaun munisipal, tanba nee husu nafatin kapasita aan, maske durante nee involve ona atividade oin oin.
Kestaun nee hatoo husi Prezidente Rede Feto Timor Leste (RFTL), Zelia Fernandes ba STL Farol Tersa nee (23/06/2026).
Nia hatete, daudaun nee Governu halo hela esforsu no sosializasaun ba iha lei poder lokal no desentralizasaun administrativu liu liu eleisaun munisipal neebe sei eleje Prezidente Autoridade Munisipal nia nomos sei hili asembleia munisipal.
“Iha eleisaun importante rua iha desentralizasaun saida mak ita nia mensajen primeiru atu hatete katak politikamente tuir lei eleisaun munisipal garantia ona partisipasaun feto nia liu liu iha organizasaun lista ba asembleia munisipal kada kandidatu tolu tenke iha feto ida signifika katak ida nee oportunidade boot ba iha feto sira atu bele hola parte iha asembleia munisipal, maibe keta katak eleisaun munisipal nee liu liu eleisaun asembleia munisipal nee ba iha partidu politiku sira signifika katak feto sira neebe inklina aan iha politku,” dehan Prezidente Rede Feto.
Prezidente Rede Feto dehan, eleisaun asembleia munisipal nee ba iha partidu politiku, signifika katak feto tenke hola parte iha partidu politiku, tanba nee mak karik ohin loron feto potensial sira neebe seidauk inklina aan iha partidu politiko, maibe hakarak atu kompete iha eleisaun asembleia munisipal hahu fihir ona partidu neebe hakarak tama nunee inklina aan iha partidu politiko hodi kompete iha eleisaun asembleia munisipal nia.
“Atu hatete katak importante tebes feto nia partisipasaun iha nivel munisipal nia ka iha dezentralizasaun nia tanba ita hakarak atu dezenvolvimentu ida neebe mai husi duni baze, entau feto nia partisipasaun no involvimentu iha prosesu demokratiko sira nee importante nunee prepara aan liu liu aproveita oportunidade sira neebe mak iha hakbiit ita nia kapasidade ho koinesementu sira atu nunee ita ba kontribui ba desizaun sira neebe reprezenta duni ita nia konstituante sira iha nivel munisipal,” dehan Zelia.
Nia hatutan, bazeia ba esperiensia bainhira organiza konferensia munisipal nia tuir sira nia haree feto iha munisipiu barak tebes mak iha kapasidade diak hodi kompete.
Nia hatete, maske durante nee feto sira hakbiit aan liu husi atividade oin no feto neebe potensial maibe kontinua kapasita aan nafatin iha saida deit nunee bele hasae diak liu tan koinesementu hodi kompete iha eleisaun munisipal.
Nunee mos Sekretaria Estadu ba Igualdade (SEI), Elvina Sousa Carvalho hatete, eleisaun munisipal ida nee mak oportunidade ba feto sira iha munisipiu atu hakat ba oin.
“Tempu nee mak ita boot sira hetan fatin sai deputada asembleia munisipal sai sekretaria munisipiu neebe mak aban bainrua separa ho sekretariu Estadu sira no nuudar membru Governu iha munisipal sira,” katak nia.
Nia hatutan foin lalais sekretaria Estadu ba Igualdade ho deputada sira serbisu hamutuk halo tiha revizaun ba lei ida koalia konaba dezentralizasaun administrativa poder lokal liu liu eleisaun administrativa iha asembleia munisipal sira laos deit feto 30% maibe feto nia inklinasaun kuaze 40%.
Nunee mos Prezidente Republika Jose Ramos Horta hatete tuir nia haree feto sira iha kapasidade neebe diak liu kompara ho mane, tanba nee Prezidente husu eleitores sira bainhira iha eleisaun Munisipal diak liu hili feto dukue mane.
Prezidente hatete dala barak feto mak hatene liu nesesidade neebe povu presiza, tanba sira mak loron loron hamutuk ho oan sira iha uma, no konaba kapasidade feto sira barak mak iha potensia diak.
(eme)
