DILI, STLTIMORLESTE.com – Madre Juliana Amaral SSpS hatete, saudozu eis Prezidente Republika Francisco Guterres Lu Olo nuudar eroi fiar nain, ezemplar iha familia, no aman luta nain ba rai ida nee, tanba husi sira nia luta sakrifisiu ohin loron ema hotu goja liberdade.
Madre Juliana Amaral SSpS ba STL iha Farol, Tersa kalan (23/06/2026) hatete, nuudar Timoroan sente triste tebes bainhira rona novidade aman luta nain Saudozu Francisco Guterres husik hela mundu ida nee.
Madre dehan, saudozu Eis Prezidente Republika Lu Olo nuudar heroi ba fiar nain, ezemplar iha familia, no aman luta nain neebe hamutuk ho nia maluk sira ho prinsipiu ida katak mate ka moris ukun rasik aan, ho sira nia didikasaun terus durante tinan 24, lori Timor ba hetan ukun rasik aan no ohin loron ema hotu goja liberdade iha rai ida nee nia leten. Tanba nee, nuudar Timor-oan sente triste tanba lakon aman diak ida, figura diak iha familia no povu no nasaun nia leet.
“Nuudar Timor-oan hau sente triste tebes fuan moras, fuan rahun, basa Timor lakon lider diak ida, aman diak ida, figura diak ida no eroi fiar nain ida avo Lu Olo, aman luta nain ba rai doben Timor Leste, hau sente triste bainhira rona novidade ida nee, tanba nee iha tuku 6:30 dader hau too ona Aeroportu hodi hatoo obrigadu ba avo neebe luta ona ba rai ida nee too ohin loron hau bele goja rai ida nee nia diak no rai ida nee nia furak neebe hau labele selu avo nia diak tomak,” dehan Madre.
Madre dehan, nuudar sidadaun Timor-oan hatoo agradese no obrigadu ba saudozu tanba lori ona nasaun nee ba dalan naroman, nunee Timor-oan tomak ohin loron goja maibe ohin Nai Maromak bolu hikas ona saudozu iha Nai nia kadunan Santo.
Iha biban nee nuudar bibi atan kreda katolika nafatin harohan ba Maromak nunee aman luta nain nia klamar bele haksolok hamutuk anju no santo sira iha lalehan.
“Hau reza ba avo atu avo haksolok hamutuk ho anju no santo sira iha Maromak nia reinu liu husi avo nia tulun bele tulun nafatin lider sira atu nunee bele lolo liman ba malu hodi lori rai ida nee kontinua ba oin sai diak no furak liu tan, hanesan saida mak avo Lu Olo halao ona iha nia viajen moris.” katak Me.
Madre haktuir tan katak, aman luta nain sira neebe uluk hamutuk iha ai laran oras nee balun laiha ona, balun sei moris, husu nafatin lolo liman ba malu tulun malu atu nunee lori nasaun nee sai diak liu tan, tanba ho sira mak ohin loron nasaun nee sai morin ona iha mundu, tanba nee lider sira presiza tulun malu nafatin atu nunee tane aas nafatin rai lulik ida neebe sosa ho raan no ruin.
Nunee mos eis Xefe Kaza Sivil, Francisco Maria de Vasconcelos hatete, uluk servisu hamutuk nuudar Xefe Kaza Sivil hamutuk iha Prezidensia tuir nia haree saudozu Lu Olo ema ida neebe simplisidade, honestu no buat neebe los nia duru tebes.
“Prezidente ema ida simplisidade, simples tebes honestu, buat neebe los nia duru tebes, hau laos servisu ho nia deit maibe hau aprende ho nia hanesan lider ida, hau admira tebes nia iha ai laran 24 anos nia mai bele halo adaptasaun neebe boot tebes konsege lidera ita nia rai husi asembleia konstituante mai restaura indepedensia too sai hanesan Prezidente Republika,” katak Eis Xefe Kaza.
Nunee mos oan daruak husi saudozu Lu Olo, Eldino Nobre hatoo nia sentimentu triste no fuan moras tebes bainhira simu informasaun nia aman hakotu iis, sai hanesan momentu ida neebe susar no dolorozu tebes ba família tomak.
Saudozu nia oan hatete, sente triste tanba lakon aman no lakon aimahon diak ida neebe durante nee sai mahon, orientador no ezemplu diak ba oan sira no família tomak.
“Aman sempre sai ezemplu diak ba ami hotu. Notísia ida nee halo ami triste no moras tebes,” dehan nia.
Nunee mos Reitor Universidade Dili (UNDIL), Jose Agostinho Belo husu joven sira tenke aprende esperiensia antigu Prezidente Republika, Francisco Guterres “Lu Olo”, tanba nia figura ida neebe maduru iha politika.
Reitor dehan, Saudozu Lu Olo hanesan figura ida neebe importante labele hetan iha universidade no fatin neebe deit, Lu Olo hanesan lideransa politika neebe sempre foti desizaun ho rasional no responsabilidade ba nia desizaun tomak, durante nia mandatu tomak, husu partidu politiku sira tenke banati tuir Saudozu Lu Olo katak tenke rona ema kiik no boot, ida nee mak modelu ida importante.
(eme)
