DILI, STLTIMORLESTE.com – Ministeriu Publiku (MP) iha nia alegasaun ba krime Obstrusaun ba Autoridade Publiku, husu Tribunal atu absolve arguidu ho inisial DdS, tanba konsidera krime neebe akuza ba iha arguidu la priense ba elementu neebe iha.
Iha alegasaun nee Prokurador Aderito Tilman deklara katak, iha audensia julgamentu arguidu deklara arguidu nia liman la kona ofendidu FGS, maibe konsege tafui deit kaben dala ida ba iha ofendidu, no arguidu mos la lori pistola bainhira tun husi kareta. No arguidu mos rekonese mosu duni diskusaun, maibe iha arguidu no ofendidu nia kolega sira konsege hafahe tiha, tanba nee arguidu nia liman la kona ofendidu.
Prokurador deklara, iha deklarasaun ofendidu nian mos deklara katak, arguidu nia liman la kona ofendidu, arguidu tafui deit kaben, no mosu duni diskusaun maibe la konsege liman la kona malu tanba kolega sira hafahe tiha, no ofendidu rasik mak halo autu notisia haruka ba iha Ministeriu Publiku.
Prokurador deklara tan, depois rona sasin nain rua hanesan arguidu ho ofendidu nia kolega servisu deklara katak, arguidu liman la kona lezadu maibe tafui deit kaben dala ida. No sasin sira haree arguidu la lori pistola. No depois akontese tiha diskusaun, arguidu fila ba uma, ofendidu kontinua halao nia servisu piket too oras remata mak foin fila.
MP haree katak, momentu neeba arguidu tafui deit kaben, la halo agresaun ruma ba ofendidu, no la uza armas, no depois akontese tiha diskusaun ofendidu mos kontiinua halao nia servisu to oras pikete termina mak foin ofendidu fila.
Tanba nee MP haree katak, arguidu nia aktu la priense ba iha Krime Obstrusaun ba Autoridade Publiku, tanba nee MP solisita ba iha Tribunal atu absolve arguidu husi krime refere.
Alende nee iha alegasaun Defeza husi arguidu nian mos aseita ho pedidu MP nian, husu atu absolve arguidu.
Rona tiha alegasaun, Tribunal adia ba loron seluk hodi rona desizaun.
Antes nee arguidu deklara, momentu neeba arguidu lori armas, tanba hetan autorizasaun tuir despaisu numeru 2/2 Fevereru autoriza arguidu hodi rai armas.
Arguidu deklara momentu neeba arguidu la hatene ofendidu halao servisu turnu, tanba nee arguidu manda mensajem ba iha ofendidu hodi husu konaba ofendidu iha neebe. Depois ofendidu hatan ba arguidu katak, ofendidu halao hela servisu iha servisu fatin. No arguidu mos manda mensajem iha ofendidu, husu atu hamos tiha posting estatus neebe ofendidu tau iha media sosial facebook neebe ofendidu uza.
Arguidu deklara, ofendidu sempre posting status iha fim da semana banhira hemu lanu, no estatus sira nee refere ba iha knaar balu PSIK nian, tanba ofendidu la aseita ho mudansa ba iha knar. Tanba nee maka arguidu fo hanoin bebeik ba iha ofendidu, atu labele poting estatus, no tenke hamos.
Arguidu deklara, liu husi mensajem ba malu entre arguidu no ofendidu mosu dezentendementu, tanba nee ofendidu mos dehan hein arguidu iha servisu fatin. Ho ida nee arguidu mos ba iha sira nia servisu fatin PSIK.
Arguidu rekonhese, momentu neeba arguidu lori duni pistola, maibe ho intensaun to iha edefisiu bele entrega tiha, maibe to iha edefisiu PSIk arguidu hare ofendidu hamrik ona iha oin, pistola arguidu tau hela iha kareta laran maka arguidu tun ba koalia ho ofendidu.
Arguidu deklara, iha diskusaun nee arguidu ho ofendidu la konsege baku malu, tanba iha sira nia kolega PSIK balu neebe halo intervensaun. Husi nee arguidu mos deside fila ba uma.
Arguidu deklara, ofendidu kuandu ho kondisaun lanu iha fim semana, sempre tau estatus hodi publika facebook, no estatus neebe ofendidu tau hatudu katak, ofendidu laos hanesan ema PSIK.
Arguidu deklara, la lori liman tuku ofendidu, maibe lori deit kaben maka tafui ba ofendidu.
Arguidu deklara, ofendidu sente hirus tanba momentu neeba iha mudansa ba kargu, ofendidu la satisfaz halo publikasaun iha media sosial hodi insulta Instituisaun. Ho ida nee arguidu fo hanoin ba iha ofendidu atu hamos publikasaun ida nee, maibe ikus mai mosu dezentendementu.
Arguidu rekonhese, ofendidu halao hela nia funsaun normal la iha perturbasaun, tanba ofendidu maka halo autu notisia no despaisu hasoru arguidu.
Aleinde nee, ofendidu deklara katak, momentu neeba ofendidu halao hela servisu piket, ofendidu simu mensajem husi arguidu ho lia fuan mal, no husu ofendidu atu baku malu, no mensajem manda liu husi watsap. Depois arguidu telefone liu husi watsap husu ofendidu nia paraderu, ofendidu mos hatak katak, nia halao hela servisu.
Ofendidu deklara, momentu neeba iha ofendidu no investigador nain rua sira maka halao hela turnu, maibe akontese tiha diskusaun nee ofendidu rasik maka halo autu notisia ho razaun tanba, ofendidu hanesan xefi ekipa investigador sira hanesan nia sub ordinariu.
Ofendidu rekonese, sira nia estatutu PSIK la proive kuandu hasoru problema, nain rasik maka halo autu notisia hodi haruka ba iha Ministeriu Publiku.
Ofendidu esplika, arguidu ba iha PSIK no ofendidu hare armas arguidu uja hela, depois tun husi kareta arguidu bolu ofendidu atu baku malu, no arguida direita tafui kaben ba iha ofendidu.
Ofendidu deklara, depois sira hases an husi fatin nee, lao uitoan ba iha kotuk, hare kolega PSIK balu mosu mai, tanba nee sira fahe malu no arguidu mos fila. No momentu nee ofendidu abandona servisu, tanba nia tauk arguidu uja hela armas no ofendidu la uja armas ida.
Ofendidu rekonhese, ofendidu mak posting estatus iha media sosial facebook. Ofendidu deklara, nia posting estatus sira nee iha tempu livre, dala ruma iha fim da semana, ho razaun tanba iha mudansa ba kargu ho ida nee maka nia sente la diak hodi posting.
Ofendidu deklara, utiliza arma nee tenke hetan autorizasaun husi sira nia superior, labele utiliza deit. Konaba sira nia kolega ida halo pasa revista ba iha arguidu, ida nee ofendidu la hare no la hatene.
Ofendidu deklara, tuir sira nia lei anterior autoriza sira nain sia maka lori arma. Maibe depois halo tiha alterasaun, kuandu uja armas iha tempu neebe liu husi mandadu buska ba suspeitu sira. Ofendidu deklara, arguidu la uja arma impede nia servisu.
Iha indisus katak, loron 14 fulan Junu tinan 2024, ofendidu halao hela servisu iha edefisiu Polisia Sentifiku Investigasaun Kriminal (PSIK).
Iha momentu neeba ofendidu simu mensajem husi arguidu liu husi watsap, ho lia fuan la diak.
Hare tiha mensajen nee, ofendidu informa kedan ba iha nia kolega ida, atu kontrola arma no dezarma arma husi arguidu nia posse.
Liu tiha minutu balu arguidu mos too ba iha edefisiu PSIk koalia ho lian makas, bolu ofendidu atu tuka malu ho ofendidu no tafui kaben ba ofendidu.
Husi neeba arguidu no ofendidu la konsege tuku malu, tanba iha membru balu husi PSIK maka dada netik sira, no ikus mai arguidu fila ba uma.
Konsekuensia husi arguidu nia hahalok nee, halo ofendidu sente tauk no abandona servisu piketi.
Tanba nee, Ministeriu Publiku akuza arguidu hanesan autor material ba krime Obstrusaun Autoridade Publiku neebe previstu iha artigu 243 husi Kodigu Penal.
Audensia julgamentu nee, prezide husi Juiz Kolektivu, Jose Maria, Ersilia de Jesus, Ana Paula, Ministeriu Publiku (MP) reprezenta husi Prokurador Aderito Tilman, arguidu hetan asistensia legal husi Defensor Publiku Fernando de Carvalho.
(ter)
