BALI, STLTIMORLESTE.com — Primeiru Ministru (PM), Kay Rala Xanana Gusmão, iha loron Sabadu (29/08/2026) ofisialmente simu restus mortais Bispu Timoroan na’in 3, mak hanesan Bispu Dom Jaime Garcia Goulart, Bispu Dom José Joaquim Ribeiro no Monseñor Martinho da Costa Lopes, iha Aeroportu Internasionál Ngurah Rai, Bali, Indonézia.
Xefe Governu Timor Leste, simu restus mortais Bispu na’in 3 ne’e iha tuku 19:30 oras Bali, bainhira PM Xanana ho delegasaun Timor-Leste to’o iha Bali atu kontinua viajen ba Jakarta hodi halao negosiasaun formál kona-bá fronteira marítima entre Timor-Leste ho Indonézia, ne’ebé tama ona bá ronda da-4.
Prosesu transladasaun restus mortais Bispu na’in 3 hosi Portugal bá Timor-Leste hala’o hosi Governu Timor-Leste, hamutuk ho Igreja Katólika.
Iha oportunidade ne’e, PM Xanana hato’o agradesimentu bá Alfândega Indonézia, liuliu ekipa iha Bali, tanba fó autorizasaun no fasilita prosesu transladasaun, hodi asegura katak prosesu hotu bele la’o ho susesu.
“Ha’u louva tebes parte Alfândega Indonézia nian, liuliu iha Bali, ne’ebé ho espíritu kooperasaun aas tebes bele fasilita prosesu ne’e no entrega ona restus mortais sira bá Governu Timor-Leste. Ha’u lori Governu no povu Timor-Leste nia naran hato’o agradesimentu bá Alfândega Indonézia,” PM Xanana hateten.
PM Xanana hateten katak prosesu transladasaun restus mortais hanesan ne’e la’ós buat ne’ebé fásil, maibé ho kooperasaun di’ak entre parte sira, prosesu bele la’o ho fásil no lalais.
Restus mortais Bispu na’in-tolu durante dékada barak hakoi hela iha Portugal, depois de sira hala’o sira-nia misaun pastorál iha Timor-Leste, iha períodu ida ne’ebé Timor-Leste hasoru situasaun polítika no sosiál ne’ebé difísil.
Repatriasaun restus mortais sira ne’e sai mós nu’udár forma homenajen bá sira-nia servisu, dedikasaun no kontribuisaun bá Igreja Katólika, povu no nasaun Timor-Leste.
Iha Portugal, Igreja iha Évora hala’o ona serimónia memória, orasaun no agradesimentu bá moris no misaun pastorál Bispu na’in-3 nian.
Serimónia ne’e mós fó oportunidade atu rekorda kontribuisaun Igreja Katólika iha istória resénte Timor-Leste, inklui testemuñu no servisu Bispu na’in-tolu nian nu’udar pastór sira, ne’ebé sira-nia memória kontinua hela iha moris Igreja Katólika no povu Timor-Leste.
Depois hosi serimónia simu iha Terminal Karga Internasionál Aeroportu Ngurah Rai, PM Xanana ho delegasaun kontinua bá Rumah Duka Mumbul, akompaña ambulánsia ne’ebé transporta restus mortais Bispu na’in-tolu nian.
Iha Rumah Duka Mumbul, sei kontinua serimónia venerasaun no misa troka-malu molok restus mortais sira-ne’e kontinua viajen bá Timor-Leste.
(jos)
