DILI, STLTIMORLESTE.com – Dapur Prezidente Republika (PR) kada loron fo han labarik no inan isin rua no fo susu ba bebe nee hamutuk 300 pesoas no liu tan.
Lia hirak nee hatoo husi Jestor Dapur Prezidente Republika, Bela Galhos ba jornalista sira iha Palasiu Prezidensial Nicolau Lobato, Bairo Pite, Sabadu (18/07/2026) hatete, kada loron dapur Prezidente Republika fo han labarik nomos inan sira neebe fo susu no isin rua 300 pesoas no dala ruma too 400.
“Fo han deit iha dapur kantina matak Palasiu Prezidensia nee besik 300 ou 400, depende ba Prezidente nia eventu, kuandu Prezidente iha eventu balun numeru nee bele sae too numeru 700 iha dapur 5 tomak loron loron, no iha fulan tomak ita tein 16 mill too 17 mill pesoas neebe mak asesu ai-haan ba dapur Prezidente nia iha fatin 5, ida iha Oecusse, Hera, Palasiu Prezidensial Kantina Matak, no rua nee deliver tanba iha parte ida lori hahan ba inan isin rua ho oan barak neebe labele lao hela iha sira nia fatin, ida fali mak iha Eskola Labeh ba kiik oan sira, tanba diretor eskola mak koalia rasik ho Prezidente, tanba nee mak loron loron lori hahan ba fatin rua nee,” dehan Jestor Kantina Matak.
Jestora Dapur Prezidente Republika hatete, hahan sira nee menu mai husi Prezidente Republika Jose Ramos Horta katak tein tenke ho modo fresku no tenke iha Sop, naan, manu tolun no hahan tenke fresku no hahan lokal, no hahan sira sosa husi merkadu lokal husi povu iha merkadu Taibesi.
“Ami mos simu modo sira hanesan koto mai husi Maubessi husi populasaun agrikultor sira neebe mai hatama iha nee no ita selu sira,” katak nia.
Nia hatete, kada loron Dapur Prezidensia Republika fo han populasaun kada fulan 15 mill pesoas nee kompostu husi dapur 5. Iha Kapital Dili nomos Oecusse.
“Hamutuk hotu 15 mill ou 17 mil kada fulan, nee orsamentu husi Palasiu Preziensia, no kada fulan ita gasta besik 20 mil dala ruma tun, no labarik sira neebe mai han nee labarik sira neebe hela besik iha nee, kriteria mak nee familia kiak, inan kiak, inan fo susu bebe, inan isin rua, no kiik oan sira neebe seidauk tama eskola, maibe imi hotu hatene Prezidente nia lalaok ba nia maske koalia kriteria sira nee se deit mak mai dapur nee ita kiak ita la fila ho kabun mamuk, entaun prezidente loke espasu ba funsionariu neebe ho salariu kiik no Prezidente dehan mai kantina matak la fila ho kabun mamuk,” katak nia.
Nunee mos Prezidente Republika hatete, Dapur Prezidente Republika kada loron fo han labarik barak no balun iha Komoro iha Eskola Labeh, ida iha Lesidere no ida iha Hera, depois ida iha Oekusi.
Prezidente Republika hatete, dapur nee sai modernu para bele fornese hahan diak liu tan ho kualidade saude publika ba labarik no inan sira neebe mak fo susu bebe nomos inan isin rua sira.
Prezidente Republika hatete, loron-loron labarik sira mai tenke fase liman no nunka falta haan no hemu bee, tanba problema boot iha Timor Leste laos deit labarik sira feto ka mane boot ka kiik ladun hemu bee, tanba nee mak problema moras rins barak.
Prezidente Republika hatete, laos fo hahan ba labarik sira deit maibe fo mos formasaun ba labarik sira oinsa bele fase liman ho sabaun antes konsumu hahan ruma, ida nee atividade neebe Prezidensial halo hodi tulun labarik sira iha Timor Leste hodi hatun numeru mal nutrisaun iha rai laran no moris ho saudavel.
(eme)
