DILI, STLTIMORLESTE.com – Presiza investe makaas iha rekursu umanus, tanba sem rekursu umanu, ekipamentus modernu saida deit sei labele uza, kuandu laiha rekursu neebe sufisiente.
Diretór Jerál Servisu Korporativus iha Ministeriu Saude (MS), Narcisio Fernandes hatete, tinan 20 ukun aan, tuir sira nia observasaun katak atu harii fasilidade saude diak ida, presiza rekursu umanus no esperiensia, katak rekursu sira nee mak sei identifika ekipamentus saida mak presiza.
“Ita labele investe ekipamentu iha Saude, nomos setor sira seluk iha orsamentu atu investe ba ekipamentu mediku, maibe nafatin ita enfrenta mak rekursu umanu sai obstraklu ida, mak sai prioridade investimentu ba oin, tanba ida nee ho klinika internamentu neebe mak ohin harii,” hatete Diretór Jerál Servisu Korporativus iha Ministeriu Saude, Narcisio Fernandes ba STL iha nia knaar fatin, Kinta (06/08/2026).
Nia esplika, laos nee deit, Ministeriu Saude mos hahu espasu ida, oinsa mak dezenvovle rekursu umanu.
Ministeriu Saude hamutuk ho mediku sira husi F-FDTL haruka ona ema lubuk ida ba Kuba, no agora daudaun bolseiru neebe estuda iha neeba hamutuk 87 pesoas inklui sira mediku husi F-FDTL nomos PNTL.
MS mos konsiente katak, Servisu Saude presiza dezenvolvimentu, liu-liu area Rekursu Umanu importante, tanba nee mak ministeriu nafatin tau prioridade tinan-tinan haruka ba nasaun sira liu-liu iha Kuba, Fiji, Filipina, nomos iha Xina inklui nasaun seluk, sai prioridade ba dezenvolvimentu rekursu umanu, iha area Saude nian.
“Tinan kotuk ami haruka tan espesialista ba estuda iha Fiji hamutuk 12, tinan ida nee planu haruka tan 24 ba tan Fiji nomos tinan ida nee ami sei haree servisu seluk, ba nasaun sira hanesan Filipina, Malazia, atu nunee haree mos ba dezenvovlimentu rekursu umanu iha futuru,” nia informa
Iha fatin ketak, Akademista UNTL, Julio da Costa informa, husu Ministeriu Saude halo rekrutamentu tan ba Pesoal Saude hodi reforsa rekurusu humanus no fornese atendimentu saude ba povu.
“Ita haree Konselhu Ministru hasai rezolusaun suspende rekrutamentu ba funsionariu hotu, maibe la haree ba rekurusu umanus menus tebes iha area rural, hanesan numeru inan sira partus iha uma sei kontinua aas, tanba Sentru Saude ka Postu Saude Parteira ida, dala ruma mediku laiha, fasilidade dook husi komunidade, neebe Governu tenke halo rekrutamentu ba Pesoal Saude hodi fo atendimentu ba pasiente no liu-liu inan isin rua sira,” nia afirma.
(jen)






