BAUCAU, STLTIMORLESTE.com – Ekipa konjunta husi Autoridade Munisipál Baucau no Ministériu Obras Públikas (MOP) Nasionál obriga sobu loja Gulter iha Suku Tirilolo, Postu Administrativu Baucau Vila, tanba fatin negósiu refere afeta ba projetu reabilitasaun estrada husi área Nagardjo to’o iha Hospitál Rejionál Eduardo Ximenes (HoREX), Baucau.
Xefe Ekipa Konjunta, Eduardo Ximenes Filipe, esplika katak desizaun sobu loja refere iha tanba na’in ba loja ne’e halo ona akordu ho Ministériu Obras Públikas no submete dokumentus, inklui kartaun eleitorál no númeru konta bankária, atu prosesa osan indemnizasaun.
Nia hatutan katak, Autoridade Munisipál Baucau liuhusi ekipa konjunta fó ona notifikasaun ba na’in loja atu iha prazu loron hitu nia laran sobu voluntariamente parte loja ne’ebé afeta ba projetu estrada. Maibé, to’o loron ne’e, na’in loja seidauk kumpre notifikasaun refere.
Tanba ne’e, ekipa konjunta ho apoiu husi Komando PNTL Munisipál Baucau no kompaña implementadór projetu halo demolisáun obrigatória tuir medida área ne’ebé afeta, atu permite servisu reabilitasaun estrada kontinua.
“Ohin ita obrigatóriu tenke sobu para servisu la’o ba oin, tanba servisu hotu la’o maibé mai metin de’it iha nia loja ne’e. Uma ne’ebé ita sobu tuir medida ne’ebé iha, pur-volta metru rua. Ema sorin-sorin sobu tiha ona, maibé senór ida ne’e de’it mak nia uma seidauk sobu. Ohin ita obriga tenke sobu,” hateten Eduardo ba jornalista sira iha Tirilolo, Sesta (20/11/2026).
Nia esplika tan katak, ekipa konjunta ne’ebé kompostu husi MOP Nasionál no Munisipál, ho apoiu PNTL, halo demolisáun liuhusi kompaña implementadór atu projetu reabilitasaun estrada bele remata tuir prazu kontratu ne’ebé Governu no kompaña asina ona.
Eduardo konsidera katak, se fatin negósiu refere kontinua la sobu, situasaun ne’e bele impede no atraza prosesu finalizasaun projetu.
Nia afirma katak, na’in loja iha ona direitu indemnizasaun ho montante besik US$4.000, tuir akordu ne’ebé nia asina ho Xefe Suku Tirilolo.
“Idemnizasaun iha tiha ona, pur-volta rihun US$4 resin, tuir akordu ne’ebé nia asina ho Xefe Suku Tirilolo. Tanba ne’e, sira tenke kopera dezenvolvimentu,” nia dehan.
Iha fatin hanesan, Tékniku Asuntu Sosiál husi Ministériu Obras Públikas, Julio de Oliveira, aprezenta katak prosesu indemnizasaun ba ema afetadu sira iha projetu reabilitasaun estrada urbana Baucau Vila, Pakote I no II, besik 60 kazu Ministériu prosesa ona.
Nia dehan katak, maioria osan indemnizasaun ba afetadu sira tama ona iha konta bankária. Maibé, ba loja Gulter, prosesu seidauk kompletu tanba iha problema kona-ba dokumentasaun no konta bankária ne’ebé afetadu aprezenta.
“Kona-ba afetadu ida ne’e, ita aprosima dala rua, la sura ho prosesu sira seluk kona-ba nia konta bankária ne’ebé daudaun iha problema, tanba uza konta empreza nian. Iha efeitu mos iha, entaun ita lakohi osan ne’ebé atu tama iha nia konta ne’e banku koa,” esplika Julio.
Nia subliña katak, MOP husu na’in loja Gulter atu aprezenta konta bankária privadu, atu Ministériu bele transfere osan indemnizasaun diretamente ba nia konta, hodi evita banku hasai osan ne’e atu selu obrigasaun finanseira empreza nian.
Julio asegura katak, osan indemnizasaun ne’e sei nafatin iha prosesu atu selu, no husu ba afetadu atu troka konta bankária hodi bele simu nia direitu.
“Osan la lakon, sei nafatin prevee hela. Tanba ne’e, ami husu atu troka konta bankária hodi hetan nia direitu, tanba prosesu iha kotuk kompaña nian ita la hatene,” nia afirma.
Entretantu, na’in loja Gulter, Anacleto Ribeiro, hateten katak nia kontinua prefere uza konta bankária empreza nian ba prosesu indemnizasaun, tanba Gulter nu’udar loja komersiál, la’ós uma hela-fatin.
“Hau nafatin uza konta bankária kompaña nian, tanba sa antes sira la husu konta individuál? Tanba ne’e ami la troka, ta’uk impaktu ikus,” hateten Anacleto.
Maski nune’e, Anacleto hateten katak nia koopera ho prosesu demolisáun loja Gulter, tanba komprende katak Baucau presiza dezenvolvimentu, inklui estrada, bee-moos, eletrisidade no infraestrutura seluk.
Ba informasaun, projetu reabilitasaun estrada husi área Nagardjo to’o Hospitál Rejionál Eduardo Ximenes (HoREX), Baucau, responsabiliza husi kompaña JOVA Construction Unipessoal Lda.
(tom)






