DILI, STLTIMORLESTE.com – Vigáriu Episkopál Arkedioseze Dili, Padre Jovito Rego de Jesus Araujo, enkoraja graduadu Institutu Siensia Relijioza (ICR) atu sai misionariu profisional neebe dedika moris tomak ba ema kiik no vulneravel sira.
Liafuan murak nee hatoo husi Vigariu Espiscopal Arkedioseze Dili, Pe. Jovito Rego de Jesus Araujo ba STL iha Salaun São José, Katedrál, Dili, Kinta nee (27/08/2026), iha serimónia graduasaun ICR ba dala XI.
“Imi sai profisional iha misaun, laos profisional hatene manan osan, Timor presiza misionáriu profisionál,” dehan Padre Jovito.
Nia husu graduadu sira atu eduka no servi ho fuan no domin, bainhira tama ba eskola, labele trata labarik ho baku ka kastigu.
“Bainhira ita hasoru labarik nakar sira, labele baku kastigu, maibe hakuak, basa sira presiza domin,” nia hatete.
Tuir nia, profisionalizmu lo-loos la dependé ba kargu, saláriu ka estatutu, maibe profisionálizmu depende ba prontidaun atu servi iha fatin hotu-hotu no tempu hotu-hotu.
“Profisionál nee hatudu katak hau nia vida tomak nee servi, hau halao misaun ida atu servi too saran aan, too hau mate, prontu nafatin, nee mak profisionál lo-loos,” nia sublina.
Padre Jovito esplika katak, fatin hotu bele sai fatin atu hatudu profisionálizmu, iha eskola hanesan profesor, iha aldeia nuudar sidadaun diak.
Nia husu atensaun ba ema kiik, kiak no ema neebe falta kbiit, grupu sira nee mak presiza servisu no atensaun liu tán.
Nia mos fo importansia ba virtude humildade no haraik aan, humildade nee hatudu katak moris fleksibilidade umana ida ne’ebe fuan nakloke ba ema hotu-hotu, nia esplika ho referénsia ba Santo Agostinho.
Padre Jovito hakotu, ho apelu atu graduadu sira transforma matenek neebe hetan iha kampus sai asaun konkretu iha komunidade ho karakter, domin, humildade no espíritu servisu.
(joa)
