DILI, STLTIMORLESTE.com – Ajénsia Kooperasaun Internasionál Koreia (KOICA) no Programa Ai-han Mundiál (WFP) asina akordu miliaun US$ 7,2 atu apoia merenda eskolár, nutrisaun no agrikultura lokál iha Timor-Leste.
Tuir komunikadu imprensa neebe STL simu husi media WFP, Kinta nee (27/08/2026) hatete, KOICA) no WFP asina akordu ho valor miliaun US$ 7,2 iha dia 26 Agostu 2026, atu hametin programa merenda eskolár, hadi’a nutrisaun no apoia agrikultura lokál iha Timor-Leste.
Akordu faze daruak ida-ne’e sei implementa durante tinan 5, husi 2026 to’o 2030, no sei fó benefísiu ba ema liu 86.000. Projetu ne’e sei hadi’a fasilidade dapur no área han iha eskola, fortifika foos, hadi’a sistema monitorizasaun dijitál no promove edukasaun nutrisaun ba estudante sira.
Tuir komunikadu nee katak, projetu ne’e mós sei hametin ligasaun entre eskola no agrikultór lokál, inklui apoiu ba grupu agrikultór 47 atu bele fornese produtu fresku no lokál ba eskola.
Aprosimasaun ne’e la’ós deit atu hadi’a asesu labarik sira ba ai-han saudável, maibé mós atu kria oportunidade ekonomia ba agrikultór no komunidade rurál.
KOICA, Governu Timor Leste no WFP sei kontinua servisu hamutuk atu harii sistema merenda eskolár sustentável ne’ebé bele kontribui ba nutrisaun labarik no hametin sistema alimentár lokál.
Serimónia asinatura akordu ne’e hala’o iha 26 Agostu, ho partisipasaun husi reprezentante Ministériu Administrasaun Estatal, Ministériu Edukasaun, Ministériu Agrikultura, Pekuária, Peskas no Floresta, no Ministériu Negósius Estranjeiru no Kooperasaun.
Projetu faze daruak ne’e bazeia ba rezultadu faze dahuluk ne’ebé implementa ona iha Munisípiu Baucau, Bobonaro no Manufahi.
Iha faze foun, apoiu sei estende ba Munisípiu Viqueque, hodi lori aprendizajen no mekanizmu ne’ebé prova ona ba eskola no komunidade barak liután.
(dom)
