DÍLI, STLTIMORLESTE.com — Klubu Basketball Ponta Leste hetan vitória importante hasoru klubu DIT BC ho skor 49:29, iha kompetisaun Liga Basketball Timor-Leste (TL), ne’ebé hala’o iha kampu basketball Ginásio Dili, iha Sábadu, 22 Agostu.
Kompetisaun ne’e hetan animasaun maka’as husi adeptus no apoiantes sira ne’ebé mai hodi suporta ekipa ida-idak. Iha sorin seluk, treinadór husi ekipa rua mós nafatin fó apoiu, instrusaun no motivasaun ba sira-nia jogador sira atu kontinua joga ho di’ak to’o jogu remata. Liga Nasionál Basketeból Timor-Leste rasik reativa fali iha 2026 depois de paragem tinan 10, ho jogu sira hala’o kada semana iha Sabadu no Domingu.
Husi inísiu jogu, Ponta Leste hatudu dominánsia iha kontrolu bola no atake. Iha primeira parte, Ponta Leste konsege sai iha oin ho skor 28:14, deixando DIT BC iha difikuldade atu responde ba atake sira.
Jogador Ponta Leste mós hatudu kapasidade di’ak iha lansa bola, liuliu liuhusi lansaun pontu tolu (3-point shot), ne’ebé ajuda ekipa aumenta diferensa pontu. Estilu jogu ofensivu ne’e halo DIT BC presiza aumenta atensaun iha defeza.
Depois de deskansa durante minutu balun, ekipa rua fila fali ba quadra hodi kontinua kompetisaun. Tama ba segunda parte, Ponta Leste nafatin kontrola ritmu jogu no domina posesaun bola. DIT BC tenta hadia situasaun no halo kontra-atake, maibé Ponta Leste konsege mantein vantajen to’o ba sesaun ikus.
To’o árbitru huu apitu naruk hodi sinaliza finál jogu, Ponta Leste sai vensedór ho rezultadu 49-29 kontra DIT BC.
Vitória ne’e hatudu Ponta Leste nia konsisténsia iha defeza, kontrolu bola no atake, enkuantu DIT BC presiza kontinua hadi’a organizasaun jogu no aproveitamentu oportunidade sira iha partida sira tuirmai. Rezultadu ida ne’e aumenta mós animasaun iha Liga Basketball Timor-Leste, ne’ebé agora foti fali modalidade basketball nasional ba públiku.
(leo)
