DILI, STLTIMORLESTE.com — FC Vila Ave Maria konsege hetan vitória 2:1 kontra FC Wafa iha kompetisaun Copa Instituto Superior Dom Bosco, ne’ebé hala’o iha kampu Futebol Dom Bosco, Comoro, Dili, iha Kuarta (26/08/2026). Vitória ida ne’e halo FC Vila Ave Maria avansa ba IV finais kompetisaun.
Jogu ne’e hala’o durante 80 minutu no prezide husi árbitru Domingos, ho juiz-laina primeru Jelino no juiz-laina segundu Octaviano.
FC Wafa Lidera iha Primeira Parte
Iha primeira parte, ekipas rua hatudu jogu ne’ebé kompetitivu, ho kontra-atake malu. FC Wafa domina posesaun bola no konsege kria oportunidade barak liu, inklui tentativa sira atu halo remate ba baliza FC Vila Ave Maria.
Esforsu FC Wafa fó rezultadu iha minutu 27, bainhira jogador Ramos, ho númeru kamiza 7, konsege hatama bola ba baliza FC Vila Ave Maria. Golu ne’e halo FC Wafa lidera ho skor 1:0 to’o primeira parte remata.
Vila Ave Maria Halo Reviravolta
Iha segunda parte, ekipas rua kontinua joga ho intenssaun aas no nafatin halo ataka ba malu. Maibé, iha parte ida-ne’e, FC Vila Ave Maria komesa domina posesaun bola no aumenta presaun ba liña defesa FC Wafa.
Esforsu ne’e fó rezultadu iha minutu 62, bainhira jogador Natan Carol, ho númeru kamiza 11, hatama golu ba baliza FC Wafa no halo skor sai 1:1.
Jogu kontinua lao ho ritmu aas. FC Vila Ave Maria nafatin domina bola no buka oportunidade atu aumenta vantajen. Iha minutu 71, jogador Rendy konsege hatama golu daruak ba baliza FC Wafa, hodi muda skor sai 2:1 ba vantajen FC Vila Ave Maria.
To’o árbitru Domingos apita rohan, skor FC Vila Ave Maria 2:1 FC Wafa nafatin. Rezultadu ne’e konfirma FC Vila Ave Maria hanesan ekipa ne’ebé manan iha fase oitavu finais no agora hakat ba kuatru finais Copa Instituto Superior Dom Bosco.
Jogu ne’e mos hetan apoiu maka’as husi adeptus no haree-nain sira, ne’ebé nafatin fó animasaun no suporta ba ekipas ida-idak durante partida.
Treinador husi ekipas rua mos kontinua fó orientasaun, instrusaun no motivasaun ba jogador sira atu bele mantein konsentrasaun no hatudu desempenhu di’ak to’o rohan kompetisaun.
Rezultadu final: FC Vila Ave Maria 2:1 FC Wafa.
FC Vila Ave Maria avansa ba IV finais.
(leo)
