DILI, STLTIMORLESTE.com — Klubu Volibol Kablaki hetan vitória hasoru Klubu Volibol Jofirma ho rezultadu 3:1, iha kompetisaun Liga Volibol Timor Leste (TL), ne’ebé hala’o iha Kampu Volibol, Ginásio Dili, iha loron Sábadu, 22 Agostu 2026.
Kompetisaun ida-ne’e hetan animasaun hosi adeptus no apoiantes sira ne’ebé mai asiste no fó apoiu ba ekipa ida-idak. Prezensa no apoiu hosi adeptus sira halo ambiente jogu sai animadu liután.
Iha set primeiru, Kablaki hatudu dezempenhu di’ak no konsege sai vensedór hasoru Jofirma ho skor 25:22.
Iha set segundu, Kablaki nafatin domina jogu, maski Jofirma fó rezisténsia maka’as. Kablaki ikus mai manan ho skor 26:24, no aumenta vantajen ba 2:0.
Maibé, iha set terseiru, Jofirma komesa hatudu reasaun no konsege manan hasoru Kablaki ho skor 25:17, nune’e rezultadu muda ba 2:1.
Iha set kuartu, Kablaki fila fali ho forsa no konsentrasaun ne’ebé aas. Ekipa ne’e konsege kontrola jogu no manan ho skor 25:15.
Ho rezultadu set sira ne’e, Klubu Volibol Kablaki sai vencedór hasoru Klubu Volibol Jofirma ho rezultadu final 3:1.
Vitória ne’e hatudu preparasaun no konsisténsia Kablaki iha kompetisaun Liga Volibol Timor-Leste, enkuantu Jofirma sei kontinua buka oportunidade atu hadi’a dezempenhu iha jogu sira tuir mai.
(leo)
