DILI, STLTIMORLESTE.com – Halibur ruin Bispu hatudu kontinuidade fiar Igreja nian husi jerasaun ba jerasaun, ne’e sentimentu agradese, respeitu no dever moral ne’ebé klean husi Deputadu Bankada FRETILIN, Antoninho Doutel Sarmento, ba Estadu no Igreja ne’ebé planeia no organiza hodi lori hikas mate-isin Bispu nain tolu mai Timor-Leste.
Deputadu ne’e hato’o kestaun ne’e ba STL iha Dili, Tersa (01/09/2026), relasiona ho preparasaun simu restus mortais preladus Katólika.
Tuir nia, Bispu nain haat nia mate haree nu’udar susesór apóstolu sira nian (Susesaun Apostólika).
“Fatin ne’ebé atu halot Amu Bispu nain haat ne’e konsidera nu’udar evidénsia istórika, katak Igreja harii iha fundasaun sasin mártir no bibi-atan sira ne’ebé ho vontade mate ba sira nia fiar,” dehan nia.
Hanesan fiar nain, nia afirma nafatin ho orasaun atu mate-isin Bispu nain tolu bele to iha Timor ho diak, no sei partisipa iha Misa ba mate-isin Bispu nain haat nian iha loron sira tuir mai.
“Deseju nafatin ho orasaun, atu Marómak Santíssima Trindade haraik fatin diak iha reinu rohan laek nian ba Amu Bispu nain haat nia klamar hamutuk ho Anju no Santu sira, harohan ba Marómak mai ita hotu ne’ebé presiza grasa Kriador nian,” nia konklui.
Iha parte ketak, Katekista Samuel dos Santos, hatete momentu halibur ruin Bispu nain haat ne’e hanesan oportunidade boot ba sarani sira, atu hanoin fali sira nia sakrifisiu no dedikasaun ba povu no Igreja iha Timor-Leste.
Entretantu, Amu Bispu nain haat ne’e mak, Dom Jaime Garcia Goulart nu’udar Bispu dahuluk Diocese Dili (1945-1967) ne’ebé harii fundasaun Igreja lokál, Dom José Joaquim Ribeiro nu’udar Bispu Dili (1967-1977) iha tempu difisil, Dom Martinho da Costa Lopes nu’udar Administrador Apostóliku Dili (1977-1983) ne’ebé sai defensór direitus umanus, no Dom Alberto Ricardo da Silva nu’udar Bispu Dili (2004-2015) ne’ebé dedika moris tomak ba formasaun kleru no edukasaun sarani nian.
(car)
