DILI, STLTIMORLESTE.com – Prezidente Republika (PR), Jose Ramos Horta hato’o solidariedade ba povu Xina hafoin inundasaun no rai monu.
Prezidente Repúblika Jose Ramos Horta hato’o sentidu kondolénsia kle’an ba Prezidente, Governu, no povu Repúblika Populár Xina nian, ho simpatia espesial ba familia sira-ne’ebé afetadu husi rai-monu no inundasaun ne’ebé foin lalais ne’e akontese iha Rejiaun Autónoma Tibet.
Iha karta ofisiál ida ho data 31 Agostu 2026 ne’ebé hato’o ba Prezidente Repúblika Populár Xina, Sua Exelénsia Sr. Xi Jinping, Prezidente Ramos-Horta espresa tristeza kle’an ba trájiku lakon vida, númeru aas husi ema sira ne’ebé relata lakon, no estragu boot ne’ebé kauza ba komunidade no infraestrutura sira iha rejiaun ne’e.
“Ha’u hakarak hato’o ha’u nia sentidu kondolénsia kle’an ba Sua Exelénsia, Governu no povu Repúblika Populár Xina, partikularmente ba família vítima sira husi rai-monu no inundasaun devastadora ne’ebé foin lalais ne’e akontese iha Rejiaun Autónoma Tibet. Iha momentu susar boot ida-ne’e, ha’u hakarak hato’o ba família sira ne’ebé lakon sira-nia maluk, ami-nia solidariedade no kompaixsaun sinseru, no mós ami nia dezeju ba forsa no esperansa ba sira hotu ne’ebé afetadu husi trajédia ida-ne’e. Ami mós hato’o ami nia solidariedade ba ekipa emerjénsia no salvamentu sira ne’ebé kontinua serbisu iha kondisaun sira ne’ebé difisil tebes hodi buka maluk sira ne’ebé lakon, tulun sobrevivente sira, no responde ba risku sira husi inundasaun no rai-monu.” dehan PR Horta.
Timor-Leste hamriik metin ho povu Repúblika Populár Xina durante tempu susar ida-ne’e no hein katak esforsu hodi buka, salva, no rekuperasaun sei hetan susesu, no komunidade sira ne’ebé afetadu bele rekupera no harii hikas ho lalais.
(eme)
