DILI, STLTIMORLESTE.com – Familia Monsenhor Martinho da Costa Lopes agradese Igreja Portugal no Governu Timor-Leste (TL) ba apoiu realizasaun momentu istóriku.
Familia Monsenhor, Cristóvão da Costa Oliveira hato’o agradesimentu ba instituisaun no komunidade sira ne’ebé kontribui ba momentu importante ne’e.
Nia hato’o agradesimentu espesiál ba Governu Timor-Leste, liuliu Prezidente José Ramos-Horta, Primeiru-Ministru Kay Rala Xanana Gusmão, membru Governu no instituisaun sira.
“Ami agradese tanba atensaun, respeitu no rekonesimentu ba vida, servisu no legadu Monsenhor Martinho da Costa Lopes,” hatete Cristóvão.
Nia ko’alia iha rezidénsia saudozu nian, Laleia, Manatuto, Kuarta-feira (02/09/2026), durante momentu aprezentasaun ba jornalista sira.
Familia konsidera rekonesimentu Estadu ba Monsenhor Martinho la’ós de’it omenajen ba ema ida, maibé valorizasaun ba istória no luta povu.
Familia mos valoriza desizaun atu fó naran “Ponte Mons. Martinho da Costa Lopes” ba ponte ida iha Manatuto.
Desizaun ne’e konsidera símbolu importante atu hametin memória no legadu Monsenhor ba jerasaun agora no futuru.
Ba Governu no Estadu Português, familia hato’o agradesimentu tanba apoiu ba prosesu translada restu mortal Monsenhor mai Timor-Leste.
“Ami agradese ba apoiu diplomátiku, legal no umanitáriu, no tratamentu ho onra, dignidade no respeitu ne’ebé Monsenhor merese,” dehan nia.
Familia mos agradece Igreja Katólika, Konferénsia Episkopal Timorense, bispu, padre, madre, relijiozu, relijioza no lideransa pastorál sira.
“Ami hato’o agradesimentu boot. Vida Monsenhor liga metin ho Igreja no povu Timor-Leste,” hatete Cristóvão.
Nia dehan, Monsenhor nia servisu pastorál, korajen no defeza ba ema vulneravel sai parte importante istória Igreja no Timor-Leste.
Familia mos hato’o agradesimentu ba Igreja Katólika Portugal, liuliu dióseze no parókia sira ne’ebé tau matan ba nia sepultura durante tinan barak.
Familia agradese ba orasaun, misa no respeitu Igreja Portugal fó ba restu mortal Monsenhor durante nia tempu iha rai Portugal.
(jen)
